Ekologııa mınıstrliginiń sý resýrstary komıteti Qazaqstan Respýblıkasynyń sý resýrstaryn basqarý júıesin damytýdyń 2021-2025 jyldarǵa arnalǵan tujyrymdamasynyń jobasyn ázirledi, dep habarlaıdy Egemen.kz.
Tujyrymdamanyń negizgi maqsaty - respýblıka azamattarynyń densaýlyǵy men ál-aýqaty úshin eldiń sý resýrstaryn saqtaý jáne utymdy paıdalaný, ekonomıka salalary men qorshaǵan orta qajettiliginiń teńgerimin qamtamasyz etý problemalaryn sheshý.
Tujyrymdama sý resýrstaryn ıntegrasııalanǵan basqarý praktıkasyn jaqsartý jáne eldi damytýdyń 2025 jylǵa deıingi ulttyq josparynda aıqyndalǵan maqsattarǵa, mindetter men tásilderge jáne Birikken Ulttar Uıymynyń ornyqty damý maqsattaryna qol jetkizýge baǵyttalǵan sý qoryn paıdalaný men qorǵaý salasyndaǵy memlekettik saıasatty iske asyrý úshin negiz bolady.
«Sý resýrstaryn basqarý júıesindegi qalyptasqan jaǵdaı sý resýrstaryn basqarý barlyq deńgeılerde birtutas bolyp tabylatyn ıntegrasııalanǵan tásildi engizý esebinen memlekettiń sý sharýashylyǵy saıasatyn túbegeıli jetildirýdi talap etedi», delingen qujatta.
Ekonomıkalyq damyǵan elderdegi jańa sý paradıgmasy «resýrsty basqarýmen» qatar sýǵa degen suranysty basqarýdy, atap aıtqanda sýdy únemdeý jáne sýdy paıdalaný tıimdiligin arttyrý arqyly birdeı qajettilikterdi qanaǵattandyrý úshin sýdyń az mólsherin paıdalanýdy kózdeıdi.
Suranysty basqarý praktıkasy sýdy únemdeýdiń materıaldyq yntalandyrýlaryn, ozyq tehnologııalardy, qoǵamdyq oqytýdy qamtıdy, bul tıimdilikti arttyrýǵa, sýdy únemdeýge jáne sýdy qaıta paıdalanýǵa ákeletin ınnovasııalarǵa túrtki bolady.
Sý resýrstary búkil sý ekojúıesiniń tutastyǵyn saqtaı otyryp, ekojúıeniń basqa komponentterimen birlikte qarastyrylady.
Sý resýrstaryn basqarýdyń ekologııalyq aspektileri eki baǵytta iske asyrylady: sýdyń zııandy áserin boldyrmaý (sý tasqyny, sý basý) jáne sýǵa tabıǵat talaptaryn saqtaý.
Budan basqa, tujyrymdamany iske asyrý jónindegi is-qımyl jospary ázirlendi.
Qujattar 16 qarashaǵa deıin kópshilik talqylaýy úshin «Ashyq NQA» saıtynda ornalastyrylǵan.