QR Energetıka mınıstrligi «Jylý energetıkasy týraly» zań jobasy men tujyrymdamasyn ázirledi, dep habarlaıdy Egemen.kz.
Usynylyp otyrǵan zań jobasy elektr energetıkasynyń jumys isteý normalaryn, onyń ishinde ulttyq elektr jelisin, elektr energııasy naryǵyn qalyptastyrý jáne onyń qyzmetiniń negizderin belgileıdi.
«Sonymen qatar, elektr energııasy naryǵynyń qurylymy jylý energııasy naryǵynan túbegeıli aıyrmashylyqqa ıe. Osyǵan baılanysty jylý jáne elektr energetıkasy salalaryn naqty ajyratýdy qamtamasyz etý qajet. Budan basqa, elektr energetıkasy salasyna qatysty tutas alǵanda búkil salanyń jaı-kúıi men damýyna jaýapty ýákiletti organ - Qazaqstan Respýblıkasynyń Energetıka mınıstrligi aıqyndaldy. Al jylý energetıkasyna qatysty tutas alǵanda búkil salaǵa jaýapty ýákiletti organ joq», delingen qujatta.
Jylýmen jabdyqtaý salasynda jumys isteıtin sýbektilerdiń, sondaı-aq tutynýshylardyń quqyqtary men mindetterine qatysty qaǵıdattar men normalardy belgileý jáne ortalyq jáne jergilikti memlekettik bılik organdarynyń róli men fýnksııalaryn aıqyndaý josparlanýda.
Energetıka mınıstrliginde atap ótkendeı, sala úshin berik mamandandyrylǵan quqyqtyq bazanyń bolmaýy naqty jáne mańyzdy problemalarǵa - jylýmen jabdyqtaý júıeleriniń damý qarqynynyń jetkiliksizdigine, salaǵa ınvestısııalardyń tómen deńgeıine, jylý energetıkasynyń turaqty jáne áleýmettik baǵdarlanǵan damýdaǵy negizgi nysanaly kórsetkishterden artta qalýyna alyp keldi.
«Jańa zańnama salanyń tehnologııalyq jańarýyn, tutynýshyǵa senimdi, sapaly qyzmet kórsetý múmkindigin, bıýdjetke eń az júkteme túsire otyryp, qyzmet kórsetý kezinde shyǵaryndylardyń úlestik jáne absolıýttik deńgeıin qysqartýdy qamtamasyz etýge múmkindik berýi tıis», dep esepteıdi Energetıka mınıstrligi.
Qujattyń tolyq mátinin 26 qarashaǵa deıin qoǵamdyq talqylaý úshin ornalastyrylǵan «Ashyq NQA» saıtynan kórýge bolady.