2022 jylǵy 1 qańtardan bastap pedofılderge elektrondy bilezik taǵylady. Bul týraly Májilistegi Úkimet saǵatynda QR Ishki ister mınıstri Erlan Turǵymbaev aıtty, dep habarlaıdy Egemen.kz.
«Probasııalyq baqylaýdy damytý úshin elektrondy bilezikter engizilýde. Bıyl biz bul jumysty tyrnaqaldy joba retinde bastaımyz. Birinshi kezekte 2022 jylǵy 1 qańtardan bastap pedofılderge qatysty qoldanylady», dedi Erlan Turǵymbaev.
Sonymen qatar ol sybaılas jemqorlyqqa qarsy naqty is-sharalar qabyldanǵanyn aıtty.
«Jemqorlyqty joıý úshin azamattarmen tikeleı baılanys azaıdy. Kólik júrgizý kýáligin berý jáne emtıhan qabyldaý fýnksııalary «Azamattarǵa arnalǵan úkimet» memlekettik korporasııasyna berildi. Tirkeý-emtıhan ortalyqtary joıyldy. Polısııa qyzmetkerleri kólik quraldarynyń krımınaldyq tarıhyn ǵana tekseredi. Qazaqstanda 30 táýlikke deıin bolatyn shetel azamattaryn tirkeý toqtatyldy. Elektrondyq vızalar engizildi. Tikeleı halyqaralyq áýejaılarǵa kirý vızalaryn berý uıymdastyryldy», dedi mınıstr.
Erlan Turǵymbaev kóshi-qon salasyndaǵy keıbir qyzmet Eńbek jáne áleýmettik qorǵaý mınıstrligine berilgenin atap ótti.
«Qala syrtyndaǵy «Shep» stasıonarlyq beketteriniń sany 36-dan 6-ǵa deıin qysqardy. Olar tek shekaralas aýdandarda qaldy. Jol qozǵalysyn qadaǵalaý arnaıy baqylaý júıeleri arqyly baılanyssyz ádispen júzege asyrylady. Barlyq patrýldik qyzmetkerler beınetirkegishpen jabdyqtalǵan», dedi ol.