Túrkistan oblysy Kentaý qalasynyń ákimine qalanyń tazalyǵyn saqtamaǵany úshin aıyppul salyndy. Alaıda sheneýnik ekologtardyń bul aıyppulymen kelispeıtinin bildirip, sotqa júgingen dep jazady Egemen.kz.
Bul týraly Ekologııa departamentiniń basshysy Ýálıhan Qaınazarov Túrkistan óńirlik kommýnıkasııalar qyzmetinde ótken brıfıng kezinde málimdedi. Kentaý qalasynyń ákimi Dáýren Maqajanovqa 100 aılyq eseptik kórsetkish kóleminde aıyppul salynǵany belgili boldy.
Kentaý qalasynyń ákimi ekologtar salǵan bul aıyppulymen kelispeı, sotqa júginipti. Ákimdiktiń baspasóz hatshysy Janna Álimbaı búgin sot otyrysy ótetinin alǵa tartyp, resmı pikirdi keıinirek berýge ýáde etti.
«О́kinishke qaraı, qazir kóp jer lastanyp bara jatqanyn baıqaısyzdar ma? Ásirese Kentaý qalasy las bop ketken. Kezinde eń taza qala bolatyn. Konteıner alańshalardyń bárin kóshege shyǵaryp tastaǵan. Ol belgilengen tártipke jatpaıdy. Sondyqtan biz jaýapty azamattarǵa aıyppul salyp jatyrmyz. Sebebi olar sol jumystardy atqarýǵa mindetti. Qala ákimine 300 myń teńge kóleminde aıyppul saldyq, qazir bizben sottasyp jatyr», dedi Ýálıhan Qaınazarov.
Ekologııa departamentiniń basshysy jaqynda Túrkistan qalasy ákiminiń orynbasaryna da aıyppul salynýy múmkin ekenin aıtty. Aıtýynsha, sheneýnikke olqylyqty retteý úshin ýaqyt berilgen. Eger oryndalmasa, ol da 100 aılyq eseptik kórsetkish kóleminde aıyppul tóleýge mindetteledi.