Qaraǵandy qalasyndaǵy Qurmanǵazy kóshesinde KamAZ júk kóligi jylý magıstralin zaqymdady. Nátıjesinde qalanyń birneshe ortalyq kóshesi jylýsyz qaldy, dep habarlaıdy Egemen.kz.
Kólemi úlken júk kóligi tasymaldaý barysynda jylý magıstrali zaqymdanǵan. KamAz júrgizýshisi júktiń bıiktigin esepke almaı, nátıjesinde 8 kósheniń turǵyndary jylýsyz otyr.
«9 qarashada gabarıti úlken júkti tasymaldaǵan júk kóligi Qurmanǵazy kóshesindegi M3b jylý magıstraliniń dıametri 820 mm tik P-tárizdi kompensatoryn zaqymdady. Qazirgi ýaqytta ýchaske jylýdan óshirildi. Passajırskaıa, N.Ábdirov, Ermekov, Pıchýgın, Novoselov, Reznık, Mojaıskıı, Qurmanǵazy kóshelerindegi turǵyn úıler men obektiler apatty rejım aımaǵyna aýystyryldy. Sodan keıin jumys brıgadasy qalpyna keltirý jumysyn júrgizdi», dep habarlady «Teplotranzıt Karaganda» JShS baspasóz qyzmeti.
Sol kúni keshke úılerdiń jylý júıesin qalpyna keltirý jáne jylý berý jumystary aıaqtaldy. Tótenshe jaǵdaıǵa kináli júrgizýshi ákimshilik jaýapkershilikke tartylyp, aıyppul tóleıdi.