12-14 qarasha kúnderi О́zbekstannyń bas shahary – Tashkentte sambodan álem chempıonatynyń jalaýy jelbireıdi. Negizi bul jarys Máskeýde uıymdastyrylýǵa tıis edi. Alaıda Sporttyq arbıtrajdyq soty (CAS) belgili sebepterge baılanysty dúbirli dodany Reseıdiń astanasynda ótkizýge ruqsat bermedi. Sol sátte ózbek aǵaıyndarymyz alǵyrlyq tanytty. Olar tórtkúl dúnıeniń eń tańdaýly balýandary bas qosatyn jarysty óz elinde ótkizýge birden nıet bildirdi. Halyqaralyq sambo federasııasy (FIAS) olardyń bul usynysyn quptady.
Áli esimizde, 2010 jyly О́zbekstan astanasynda álem chempıonaty dúrkirep ótken edi. Biz de sol jarystyń kýási boldyq. Dúbirli dodada Qazaqstannyń erler men áıelder quramalary 2 altyn, 1 kúmis jáne 5 qola medaldy ıelenip, jalpykomandalyq esepte úshinshi orynǵa turaqtady. Jerlesterimiz tek Reseı men Belarýsten ǵana qalyp qoıdy. Tashkent tórinde Erbolat Baıbatyrov pen Azamat Muqanov altyn alsa, Álııa Jylqybaeva kúmispen kúpteldi. Al Arsen Hatıp, Saıat Shámshıev, Lınara Meńǵazova, Álmıra Isataeva jáne Anar Seıtimetova qolaǵa júldege ıelik etti.
Sodan beri 11 jyl ótti. Sambo kúresiniń akademıgi sanalǵan ataqty bapker Kereı Qoıshybektiń tusyndaǵy sol tabysymyzdy qaıtalaýǵa qazir de jaqsy múmkindik bar. Sebebi búgingi tańda ulttyq qurama sapyna ilikken jigitter men qyzdardyń arasynda osaly joq. Barlyǵy da talaı iri dúrmekte ysylǵan saqa sportshylar. Erler arasynda Nurbol Serikov pen Bolatbek Raıymqulovqa erekshe senim artylýda. Olardyń ekeýi de Batys Qazaqstan oblysynyń túlekteri. 71 kılo salmaqta saıysqa túskeli otyrǵan Serikov 2018 jyly álem men Azııa chempıonattarynda qarsylas shaq keltirmeı, bas júldeni qanjyǵasyna baılady. 58 kılo salmaqtaǵy Raıymqulov Seýlde ótken dúnıejúzilik dodada kúmis medaldy moınynda jarqyratty. Nurbol men Bolatbektiń taǵy basqa da tolyp jatqan ataqtary bar. Ońtústik Koreıanyń astanasynda 64 kılo salmaqtaǵy qaraǵandylyq Rahat Jańanıettiń de asyǵy alshysynan túsip, qola júldeni qorjynǵa saldy. Osy jigitter Tashkenttegi jarystyń basty favorıtteriniń biri sanalady. Bul balýandardan bólek, Aıdyn Dartaev (79 kılo), Erkebulan Qalesh (88 kılo), Marat Baıkamýrov (98 kılo) jáne Temirlan Kólbaı (+98 kılo) aldaǵy kúnderi boz kilemge shyǵady.
Áıelder quramyndaǵy eń ataqty balýanymyz Dildásh Quryshbaeva ekeni daýsyz. 72 kılo salmaqta beldesip júrgen Almaty oblysynyń týmasy álem chempıonatynda baqandaı bes ret jeńis tuǵyryna kóterildi. 2014 jyly Narıtada, 2019 jyly Seýlde kúmis medaldi ıelense, 2013 jyly Sankt-Peterbýrg, 2015 jyly Kasablanka jáne 2016 jyly Sofııada qola júldeni enshiledi. Qurlyq birinshiliginde bes márte top jardy. 2018 jyly Jakartada alaýy tutanǵan Azııa oıyndarynda altynnan alqa taqty. Bir sózben aıtsaq, Quryshbaeva – kúres óneriniń jilik maıyn shaqqan ákki balýan. Onyń qorjynynda tek dúnıejúzilik dodanyń bas júldesi ǵana joq. Dildásh sol olqylyqtyń ornyn Tashkentte toltyrady dep úmittenemiz.
65 kılo salmaq dárejesinde baq synap júrgen Ajar Salyqova osydan eki jyl buryn Seýlde álem chempıonatynyń qola júldegeri atandy. Qazaq qyzynyń endigi armany – altyn tuǵyrǵa kóterilý. Azııa oıyndarynyń qola júldegeri Aıjan Jylqybaevanyń da áleýeti mamandar tarapynan joǵary baǵalanýda. Ol 50 kılo salmaqta kúresedi. Sonymen qatar, Tashkentte Marjan Bızaq (59 kılo), Azman Amaeva (80 kılo) jáne Araılym Ábenovanyń (+80 kılo) da ónerin tamashalaımyz.
Jaýyngerlik sambodan ótetin jarysta Nurken Dombaev (58 kılo), Ádilbek Seıisov
(64 kılo), Amanjol Nuralyuly (71 kılo), Nurlan Turǵanbaev (79 kılo), Ýmar Iаnkovskıı (88 kılo), Raıhan Mádı
(98 kılo) jáne Maqsot Daıyrbaev
(+71 kılo) el namysyn qorǵaıdy. Jekpe-jekke shyǵatyn bul jigitter de jarqyn jeńisterimen óz jankúıerlerin qýantady dep oılaımyz.
Taǵy bir erekshe toqtala ketetin jaıt, FIAS bıylǵy álem chempıonatyna arnaıy júlde taǵaıyndap otyr. Tashkentte ol 231 000 AQSh dollaryn quraıdy. Iаǵnı osy joly bas júldeni oljalaǵan balýanǵa 4 myń $ beriledi. Kúmis alǵandarǵa 3 myń $, al qolaǵa qol jetkizgenderge 2 myń $ tıesili bolady.