Qazaqstanda qala turǵyndary úshin táýliktik sý tutyný normasy belgilenedi. Bul týraly QR Indýstrııa jáne ınfraqurylymdyq damý birinshi vıse-mınıstri Qaıyrbek О́skenbaev málimdedi, dep habarlaıdy Egemen.kz.
«Bıyl alǵash ret ilki joba retinde aýyz sýdy esepke alý aspaby bolǵan kezde bir adamǵa táýligine 140 lıtrge deıin ǵana sýdy sýbsıdııalaý boıynsha normatıvtik shekteý belgiledik. Aýyldyq jerdegi árbir turǵynǵa sýdy sýbsıdııalaımyz. Aýyl turǵyndaryna sýdyń tekshe metri sýdy esepke alý aspaby bolǵanda, 30 teńgeni, al aspapsyz 40 teńgeni quraıdy. Keıde bizde sýdyń naqty quny 3 myń teńgege de jetip jatady», dedi ol Májilistegi dóńgelek ústel barysynda.
Onyń aıtýynsha, aýyldyń ár turǵynyna táýligine 140 lıtr sý jetkilikti. Eger turǵynnyń bir táýliktegi tutynǵan sýy normadan asyp ketse, onda ol sýdyń artyq kólemine kommersııalyq baǵamen aqy tóleıdi.
«Qazirgi ýaqytta dál osyndaı normatıvtik shekteýdi qala turǵyndary úshin de ázirlep jatyrmyz. Biz adamdarǵa sýdy únemdeýdi, baǵalaýdy úıretýimiz kerek. Belgilengen norma asyp ketken jaǵdaıda turǵyndar sýmen jabdyqtaý qyzmetine tolyq tarıf tóleıtin bolady», dep naqtylady Qaıyrbek О́skenbaev.