Almaty qalasynda «Máńgilik birgemiz» atty Halyqaralyq avtorlyq ıntererlik qýyrshaqtar kórmesi ótip jatyr. Á.Qasteev atyndaǵy Memlekettik óner mýzeıinde uıymdastyrylǵan kórme adamzattyń ǵaryshqa alǵash ret ushqanyna 60 jyl tolýy men Qazaqstandaǵy «Balalar men jasóspirimderdiń oqýyn qoldaý» jylyna arnalyp otyr.
Atalǵan kórmeniń 2021 jylǵy resmı qýyrshaǵy kókshetaýlyq sheber Anastasııa Elıseevanyń «Gagarın. Ǵaryshta tuńǵysh ret» atty jumysy bolyp otyr. Bul qýyrshaq bıyl ǵaryshqa ushqan reseılik kıno tobynyń quramynda bolǵan aktrısa Iýlııa Peresıldke tapsyrylmaq. Sondaı-aq Anastasııa Elıseevanyń «Gagarın» toptamasynan eki jumys Máskeýdegi Kosmonavtıka mýzeıinde ótetin taqyryptyq kórmege qatysýǵa shaqyrý aldy.
«Máńgilik birgemiz» Besinshi halyqaralyq avtorlyq ıntererlik qýyrshaqtar kórmesi 14 qarashaǵa deıin sozylady.