Elordanyń bas qaqpasy – Nursultan Nazarbaev halyqaralyq áýejaıy arqyly kúnine 8 myńǵa jýyq jolaýshy ushyp kelse, osynshama adam keri qaıtady. Táýligine munda 160-taı reıs ushady. Onyń 50-i halyqaralyq. Áýejaı̆ – strategııalyq obekt. Sol sebepti de áýe nysandaryndaǵy qaýipsizdikti qamtamasyz etý, kelimdi-ketimdi jolaýshylardyń quqyn qorǵaý kólik polısııasynyń negizgi mindetine aınalǵan.
Elimizdiń bas qalasyna túrli memleketten ushyp kelgen jolaýshylar eń aldymen JPB polısııa qyzmetkerlerin synǵa alyp, qazaqstandyq polısııa qyzmeti týraly pikir qalyptastyratyny anyq. Basqasha aıtqanda, jelilik polısııa bóliminiń qyzmetkerleri jalpy búkil ishki ister organdarynyń bet perdesi sekildi. Sondyqtan Nur-Sultan qalasy áýejaı̆ynyń kólik polıseı̆lerine júktelgen jaýapkershilik te jeńil emes. Onyń bastysy – áýe kóligi nysanynda qoǵamdyq qaýipsizdikti qamtamasyz etý, quqyq buzýshylyqtyń aldyn alý jáne tártipti saqtaý.
Jaqynda áýejaı aýmaǵynda Hi-tech jedel aldyn alý is-sharasy ótkizildi. 8-14 qarasha aralyǵynda iske qosylǵan operasııanyń basty maqsaty – joǵary tehnologııalar salasyndaǵy qylmystarǵa qarsy tosqaýyl qoıý. Halyqaralyq áýejaıdaǵy jelilik polısııa bólimi basshysynyń jedel qyzmet jónindegi orynbasary Erdos Baltabaev: «Sońǵy ýaqytta tym kóbeıip ketken ınternet alaıaqtyǵynyń aldyn alýdyń strategııalyq nysanda ótkiziletin kez kelgen aqparattyq, úgit-nasıhat jumystarynyń bereri mol. Sebebi ádette qylmyskerler aram oılaryn iske asyrý úshin halyq nópiri qalyń jerdi tańdaıdy» deıdi. «Qazirgi tańda ınternet jáne telefon arqyly jasalatyn alaıaqtyqtyń túr-túri shyǵa bastady. О́tirik jarnama berý, qyzmet túrin usyný, satý-satyp alý týraly jalǵan aqparat taratýmen qatar, uıaly telefonǵa habarlasyp, qıyn jaǵdaıǵa tap bolǵanyn aıtyp, aqshalaı kómek suraıtyndar da kóbeıgen. О́zderin bank qyzmetkeri retinde tanystyryp, esepshottaǵy aqshany túrli syltaý aıtyp, úshinshi bir shotqa aýdartyp alatyn ákkiler de adam psıhologııasyna qalaı yqpal etý kerektigin jaqsy bilip alǵan. Áýejaıda jolaýshylarǵa túrli ekstremıstik, terrorıstik, pornografııalyq sıpattaǵy kontrafaktilik ónimderdi taratý faktileriniń aldyn alýǵa da erekshe mán beriledi», deıdi polısııa podpolkovnıgi.
Hi-tech-tiń basty maqsatynyń taǵy biri – qatygezdik pen zorlyq-zombylyqty nasıhattaıtyn, arnaıy tehnıkalyq quraldar men uıaly telefondarǵa arnalǵan zııandy baǵdarlamalardy anyqtaý. Al bul baǵytta belgili bir nátıjege qol jetkizý úshin kompıýterdiń tilin jetik biletin bilikti maman qajet ekeni túsinikti.
«Kólik polıseıleri – ishki ister organdarynda halyqpen etene jaqyn jumys isteıtin sala qyzmetkerleriniń biri. Sol sebepti de bizder Hi-tech sekildi jedel operasııalardyń basty maqsat-mindetin jolaýshylar arasynda júrip, jan-jaqty túsindiremiz, jadynamalar taratamyz. Basty maqsat – elimizge kelgen qonaqtar men azamattarymyzdy ınternet alaıaqtarynyń qıturqylyǵynan saqtaý, aqparattyq tehnologııalar salasyndaǵy quqyq buzýshylyqtardy der kezinde anyqtap, jolyn kesý», degen E.Baltabaev ınternet alaıaqtyqqa qatysty qylmys pen quqyq buzýshylyq týraly aqparat bergenderge aqshalaı syıaqy tólenetinin de eske salyp ótti.
El kóleminde iske qosylǵan Hi-tech jedel is-sharasy barysynda 150-den astam kıberqylmys anyqtalǵan bolsa, onyń deni ınternet alaıaqtyqqa qatysty bolyp otyr. Operasııa barysynda buryn jasalǵan 200-ge jýyq qylmystyń da beti ashylǵan. Internet pen áleýmettik jelini jaýlap alǵan qylmystyń bul túri quryǵyna kez kelgen jastaǵy adamdy túsirýi múmkin. Sol sebepti de kólik saqshylary áýejaıǵa kelgen árbir jolaýshyny qyraǵy bolýǵa, alaıaqtardyń ońaı ári tez paıda tabasyz nemese arzan bolǵanymen sapaly qyzmet jasalady degen ýádesine senbeýge shaqyrady. Eń bastysy, osyndaı jaǵdaılardyń barlyǵyn dereý polısııaǵa habarlaý qajet ekenin eskertedi.