Kókshetaýda qurylysshy 9-shy qabattan qulap mert boldy. Polısııa qylmystyq is qozǵady, dep habarlaıdy Egemen.kz.
Aqmola oblystyq PD baspasóz qyzmetiniń málimetinshe, 9 qarasha kúni Kókshetaý qalasy polısııa basqarmasynyń kezekshi bólimine jedel medısınalyq járdem feldsheri telefon arqyly habarlasqan. Ol qurylys jumysy kezinde 9-qabattan abaısyzda 1966 jylǵy oblys ortalyǵynyń turǵyny qulaǵanyn aıtty. Er adam alǵan dene jaraqatynan kóz jumǵan.
«Bıylǵy 10 qarashadaǵy sot-medısınalyq saraptamanyń qorytyndysyna sáıkes ólimge «bastyń defýzdy jaraqaty, bastyń, ishtiń, jambastyń, qol-aıaqtyń úılesimdi jaraqaty, bıiktikten qulaý» sebep bolǵan. Bul jaǵdaı Qylmystyq kodekstiń 277-shi babynyń 2-shi bóligi (qurylys jumystaryn júrgizý kezinde qaýipsizdik erejelerin buzý) boıynsha sotqa deıingi tergeýlerdiń biryńǵaı tizilimine engizilgen», dedi vedomstvodan.