Bilim jáne ǵylym mınıstri Ashat Aımaǵambetovtyń aptalyq jumysyna beıne sholý jarııalandy, dep habarlaıdy Egemen.kz.
Bilim jáne ǵylym mınıstri Ashat Aımaǵambetov Dúnıejúzilik bank ókilderimen kezdesti.
Kezdesýde adam kapıtalynyń óńirlik damý máseleleri talqylandy. Sondaı-aq bilim berý júıesin qoldaýǵa baǵyttalǵan baǵdarlamany iske asyrý tetikteri men ádistemesi qaraldy. Dúnıejúzilik banktiń bilim berý salasyn qosa alǵanda, memlekettik shyǵyndardy sholý boıynsha zertteý jumystary pysyqtaldy. Mınıstrlik bilim berý salasyndaǵy shyǵyndardy muqııat taldaý úshin Dúnıejúzilik banktiń Mańǵystaý, Atyraý jáne Túrkistan óńirlerin aıqyndaý týraly usynysyn qoldady. Taraptar kún tártibinde belgilengen barlyq másele boıynsha ortaq pikirge keldi.
Ashat Aımaǵambetov ǵylym salasyndaǵy normatıvtik-quqyqtyq aktilerge engizilgen ózgerister týraly málimdedi.
Bilim jáne ǵylym mınıstri áleýmettik jelidegi paraqshasynda Úkimet qaýlysymen úsh negizgi normatıvtik-quqyqtyq aktige ózgerister engizilgenin aıtty. Olardyń qatarynda Ulttyq ǵylymı keńester týraly ereje, memlekettik ǵylymı-tehnıkalyq saraptamany uıymdastyrý jáne júrgizý qaǵıdalary, bazalyq, granttyq, baǵdarlamalyq-nysanaly qarjylandyrý qaǵıdalary bar. Endi 12 aıdan astam merzimge granttyq qarjylandyrý alatyn jobalar boıynsha aralyq esepter tapsyrýdyń qajeti joq. Sondaı-aq mınıstr konkýrstyq rásimderdi ótkizý merzimi 145 jumys kúninen 92-ge deıin qysqartylǵanyn jetkizdi. Ashat Aımaǵambetovtiń aıtýynsha, konkýrstyq ótinimderge qosymshalardyń sany 12-den 5-ke deıin azaıtylǵan. Sonymen qatar Ulttyq ǵylymı keńes músheleriniń Ádep kodeksi bekitildi. Mınıstr jazbasynda rásimder merzimin azaıtýǵa baǵyttalǵan taǵy bir ózgeris toptamasyn ázirlenip, engiziletinin aıtty.
«BǴM LIVE» aıdarynda mektep oqýshylaryna arnalǵan olımpıadalar týraly aqparat usynyldy.
Instagram áleýmettik jelisi arqyly oqyrmandardyń suraqtaryna «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov jaýap berdi.