Qazaqstannyń Iran Islam Respýblıkasyndaǵy Elshiligi qazaqstandyq «Aıalaǵan alaqan» qoǵamdyq qaıyrymdylyq qorynyń bastamasymen ári qoldaýymen Tegerannyń «Zárna» kórkemóner galereıasynda «Álem balalar kózimen» atty qazaqstandyq múmkindigi shekteýli balalardyń sýret kórmesin ótkizdi.
Kórmege múmkindigi shekteýli balalarǵa kómek kórsetetin «Aıalaǵan alaqan» qoǵamdyq qaıyrymdylyq qory usynǵan balalardyń sýretteri qoıyldy. El Táýelsizdiginiń 30 jyldyǵyna oraı uıymdastyrylǵan kórme balalardyń armany men ómirge degen qushtarlyǵyn ashýdy maqsat etti. Kórmege qoıylǵan týyndylardy ırandyq óner, bilim qaıratkerleri, isker toptar ókilderi, Qazaqstan azamattary men Irandaǵy qazaq dıasporasynyń ókilderi tamashalady.
Qazaqstandyq balalardyń shyǵarmashylyǵymen tanysqan zań ǵylymdarynyń doktory, professor Saııed Hasan Amın, músinshi Fateme Asadı jáne ózge de ırandyq qaıratkerler jas daryndardyń qylqalamynan ómirge degen ińkár kózqaras baıqalady dep baǵa berdi.