Búgin MediaNet Halyqaralyq jýrnalıstıka ortalyǵy Konrad Adenaýer atyndaǵy qordyń jáne Nur-Sultandaǵy EQYU Baǵdarlamalar ofısiniń qoldaýymen «Internetti retteý» taqyrybynda «Ortalyq Azııadaǵy ınternet salasynyń damýy InternetCA-2021» atty XII Ortalyq Azııa forýmy bastaldy, dep habarlaıdy Egemen.kz.
Eki kúnge jalǵasatyn is-shara gıbrıdti formatta ótýde.
Konrad Adenaýer atyndaǵy qordyń Qazaqstandaǵy ókildiginiń dırektory Iohannes Raı, Nur-Sultandaǵy EQYU Baǵdarlamalar ofısiniń basshysy d-r Folker Frobart, MediaNet Halyqaralyq jýrnalıstıka ortalyǵynyń dırektory Ádil Jalılov alǵy sóz aıtty.
Forým barysynda onlaın-resýrstardy buǵattaý jáne sóz bostandyǵy, balalardy kıberbýllıngten qorǵaý týraly zańnamalyq bastama, memlekettiń róli jáne jahandyq jelini retteýdiń halyqaralyq praktıkasy, ózin-ózi retteý múmkindikteri, ınternetti retteý boıynsha Ortalyq Azııa elderiniń ulttyq zańnamalyq praktıkasy máseleleri talqylanady.
Is-sharaǵa halyqaralyq jáne ortalyqazııalyq sarapshylar, memlekettik organdar men úkimettik emes uıymdardyń ókilderi, jýrnalıster, blogerler, zańgerler, ınternet-belsendiler qatysady.
Búgin Aqparat jáne qoǵamdyq damý vıse-mınıstri Kemelbek Oıshybaev «Internetti retteý: Qazaqstan jáne halyqaralyq praktıka» paneldik pikirtalasyna qatysty. Ol Qazaqstandaǵy ınternet jelisin retteýdiń qazirgi jaǵdaıy men perspektıvalary týraly baıandady.
Sondaı-aq, paneldik pikirtalasta EQYU-nyń BAQ bostandyǵy máseleleri jónindegi ókili bıýrosynyń aǵa keńesshisi Andreı Rıhter (Avstrııa), «Digital Paradigm» QQ dırektory, quqyq qorǵaýshy, Quqyq qorǵaýshylardyń jańa býyny koalısııasynyń múshesi, Sıfrlyq quqyqtar jónindegi sarapshylar tobynyń qatysýshy Eljan Qabyshev (Qazaqstan), Human Constanta-nyń negizin qalaýshylardyń biri Alekseı Kozlıýk (Belarýs), «Internetti qorǵaý qoǵamynyń» basshysy Mıhaıl Klımarev (Reseı) sóz sóıledi.
Forýmnyń ekinshi kúni adam quqyqtary men bostandyqtary salasyndaǵy onlaın-jobalardyń tusaýkeserleri men sheberlik sabaqtaryna arnalady.