SES spýtnıktik operatory, Respýblıkalyq ǵaryshtyq baılanys ortalyǵy (RǴBO) jáne AsiaNetCom kompanııasy Qazaqstannyń shalǵaı eldi mekenderinde joǵary jyldamdyqty baılanys arnalaryn testileý úshin pılottyq jobany iske qosty, dep habarlaıdy Egemen.kz.
«Kókterek» ǵaryshtyq baılanys ortalyǵynda ornalasqan teleportty qosý úshin SES kompanııasynyń birinshi býyndaǵy O3b spýtnıkteri qoldanylady. Internetke qol jetkizý Aqterek jáne Beriktas aýyldyq eldi mekenderiniń turǵyndary úshin júrgiziletin bolady. Kompanııalar tómen túsetin arna boıynsha ınternet jyldamdyǵyn 380 Mbıt/s jáne SES O3b spýtnıktik toptamasy arqyly 120 Mbıt/s qamtamasyz ete aldy.
Aıta ketsek, SES álemdegi jalǵyz kóp orbıtalyq jerseriktik toptamany ǵalamdyq qamtý men joǵary ónimdiliktiń erekshe úılesimimen, sonyń ishinde is júzinde dáleldengen O3b ortasha orbıtalyq júıesimen basqarady. Jerseriktik baılanys arnalary arqyly ınternetke qoljetimdilik aýyldarda 30 kún ishinde beriletin bolady.
«Sıfrlyq damý mınıstrliginiń negizgi mindetteriniń biri barlyq aýyldyq eldi mekenderdi ınternet jelisine keń jolaqty qoljetimdilikpen qamtý bolyp tabylady. Búgingi tańda Qazaqstandaǵy 617 aýyl jerústi baılanys tehnologııalaryna qosylmaǵan. Biz ártúrli eldi mekenderde ınternetke joǵary jyldamdyqty qoljetimdilikti qamtamasyz etý úshin spýtnıktik tehnologııalardy paıdalaný máselesin zerttep jatyrmyz», dedi Sıfrlyq damý, ınnovasııalar jáne aeroǵarysh ónerkásibi vıse-mınıstri Málik Oljabekov Nur-Sultanda ótken baspasóz konferensııasy barysynda.
«RǴBO» AQ Basqarma tóraǵasy Málik Júıriktaev elimizde shalǵaı aýyldarda joǵary jyldamdyqty baılanys arnalarymen qamtamasyz etý úshin ınnovasııalyq spýtnıktik tehnologııalardy qoldaný múmkindikteri qarastyrylyp jatqanyn atap ótti.
«Respýblıkalyq ǵaryshtyq baılanys ortalyǵy Qazaqstannyń ulttyq spýtnıktik operatory bola otyryp, bizdiń halyqaralyq áriptesterimizben yntymaqtastyqta elimizdiń telekommýnıkasııalyq naryǵyndaǵy tutynýshylarymyzdyń ósip kele jatqan qajettilikterin qanaǵattandyrý úshin neǵurlym ońtaıly ınnovasııalyq tehnologııalyq spýtnıktik sheshimderdi aıqyndaý boıynsha jumys júrgizýde. Biz birqatar kelissózder júrgizdik, bizdiń mamandar halyqaralyq naryqta qoldanylatyn usynystardy zerttep jatyr. Osyndaı qyzyqty, ınnovasııalyq sheshimderdiń biri - SES O3b kompanııasynyń ortasha orbıtalyq spýtnıktik toptamasy. Bizdiń kelissózderimiz ben yntymaqtastyǵymyzdyń nátıjesi retinde demonstrasııalyq baǵdarlama bolyp tabylady, onyń aıasynda biz barlyq qajetti testilik synaqtardy ótkizýdi josparlap otyrmyz», dep túsindirdi Málik Júıriktaev.
SES kompanııasynda atap ótkendeı, O3b mPOWER spýtnıktik toby paıdalanýǵa berilgennen keıin qýat ósimin arttyrý josparlanýda. Sonymen qatar, O3b mPOWER Úkimettiń, bıznestiń jáne uıaly baılanys operatorlarynyń ósip kele jatqan qajettilikterin qanaǵattandyrý úshin aıtarlyqtaı joǵary ónimdilik pen ıkemdilikti qamtamasyz etedi.
«Bizdiń komanda seriktesterimizben birge osy sátti demonstrasııany júzege asyrý úshin tynymsyz jumys jasady. Biz 380 Mbıt/sek tómen túsetin arnanyń jáne 120 Mbıt/s joǵary shyǵatyn arnanyń jyldamdyǵyna qol jetkizdik, munyń Qazaqstannyń aýyldyq aýdandarynda balamasy joq. Biz Qazaqstanǵa óz maqsattaryna - atap aıtqanda adamdar úshin baılanysty qamtamasyz etýge kómektesý úshin «Sıfrlandyrý, ǵylym jáne ınnovasııalar esebinen tehnologııalyq serpilis» ulttyq jobasyn qoldaýǵa tolyǵymen beıildimiz. Demonstrasııa aıaqtalǵannan keıin biz nátıjeli yntymaqtastyqqa úmittenemiz», dedi SES qarjy dırektory Sandıp Djalan.
QR Sıfrlyq damý, ınnovasııalar jáne aeroǵarysh ónerkásibi vıse-mınıstri Málik Oljabekovtyń aıtýynsha, vedomstvo SES kompanııasymen dástúrli jerserikterdi paıdalaný máselelerin sheshý maqsatynda eki jyl buryn ózara is-qımyldy bastaǵan.
«O3b spýtnıkteri sheshe alatyn negizgi mindet - shalǵaıdaǵy aýyldyq eldi mekenderdi ınternet jelisine keń jolaqty qoljetimdilikpen qamtamasyz etý», dep atap ótti vıse-mınıstr Málik Oljabekov.