Osy jyldyń 9 aıynda Qazaqstan men SPECA elderi arasyndaǵy taýar aınalymy 4,8 mlrd dollardy qurady. Bul ótken jylǵy dál osyndaı kezeńmen salystyrǵanda 27,3 paıyzǵa joǵary kórsetkish. Bul jaıynda QR Ulttyq ekonomıka vıse-mınıstri Álibek Qýantyrov «Pandemııadan keıingi jasyl jáne ınklıýzıvtik ekonomıkany damytý úshin turaqty kólik jáne saýda» SPECA 2021 ekonomıkalyq forýmynda málim etken, dep habarlaıdy Egemen.kz.
«Vıse-mınıstr búginde Qazaqstanda SPECA elderiniń 4 400 kompanııasy jáne 800 birlesken kásiporyny jumys isteıtinin atap ótti. Sońǵy 10 jylda SPECA otandyq ekonomıkaǵa $210,7 mln ınvestısııa saldy.
Mınıstrdiń orynbasarynyń aıtýynsha, Qazaqstan jahandyq trendterden tys qalmaıdy jáne «jasyl ekonomıkaǵa» kóshý is-sharalaryn qabyldaýda. 2013 jyly «jasyl ekonomıkaǵa» kóshý jónindegi tujyrymdama qabyldanyp, «jasyl» ósýge qol jetkizý jáne ekonomıkany tereń kómirteksizdendirý úshin ekonomıkany damytýdyń uzaqmerzimdik nusqalaryn qamtıtyn 2060 jylǵa deıingi Tómenkómirtektik damý strategııasy ázirlenýde», delingen UEM baspasóz qyzmeti taratqan aqparatta.
Vedomstvo málimetinshe,halyqaralyq forým barysynda Qazaqstan Turaqty hatshylyq mekemesi arqyly SPECA baǵdarlamasyn reformalaý men bekitýdi usyndy. Ol SPECA-nyń BUU-nyń basqa da halyqaralyq jáne óńirlik uıymdarymen negizgi baǵyttar boıynsha tıimdi ári jedel ózara is-qımylyn qurýǵa múmkindik beredi.
Aıta keteıik, 1997 jyly BUU ázirlegen SPECA baǵdarlamasy QR Tuńǵysh Prezıdenti Nursultan Nazarbaevtyń bastamasymen iske qosyldy. Qazirgi ýaqytta ony júzege asyrýǵa Qazaqstan, Qyrǵyzstan, Tájikstan, Túrkimenstan, О́zbekstan, Ázirbaıjan jáne Aýǵanstan elderi qatysýda.
Al SPEKA-nyń maqsaty - atalǵan elderdiń ózara yntymaqtastyǵyn tereńdetýge yqpal etý, ekonomıkalyq damýdy yntalandyrý jáne olardyń Eýropa jáne Azııa elderi ekonomıkasy ıntegrasııasyna járdem etý.