Nur-Sultan qalasyndaǵy Dostyq úıinde ótken Qazaqstan halqy Assambleıasynyń respýblıkalyq Medıasııa keńesiniń otyrysynda etnomedıasııany damytý máseleleri keńinen sóz boldy.
Parlament Májilisiniń depýtattary, memlekettik organdar, qoǵamdyq uıymdar, QHA qoǵamdyq qurylymdary, Medıasııa ortalyqtarynyń ókilderi, QHA kásibı jáne kásibı emes medıatorlary, óńirlik medıasııa kabınetteriniń basshylary qatysqan alqaly jıynda medıasııa ınstıtýtyn daýlar men janjaldardy sheshýdiń qoǵamdyq-quqyqtyq quraly retinde damytý joldary talqylandy. Esterińizde bolsa, el Prezıdenti 2021 jylǵy 21 qazanda Qazaqstan halqy Assambleıasy Keńesiniń keńeıtilgen otyrysynda etnomedıasııany damytýǵa qatysty birqatar tapsyrma bergen bolatyn.
Jıynda Qazaqstan halqy Assambleıasy Tóraǵasynyń orynbasary – Hatshylyq meńgerýshisi Marat Ázilhanov jalpyulttyq birliktiń Táýelsiz Qazaqstannyń birden-bir qundylyǵy ekenin atap ótip, Assambleıanyń 2010 jyldan bastap medıasııa ınstıtýtyn damytý boıynsha aýqymdy jumys júrgizip kele jatqanyn aıtty. «Berekeli tatýlyǵymyz ben etnosaralyq kelisim arqasynda memleketimizdiń damýy jalǵasyp keledi. Biz erteńgi bolashaqqa zor úmitpen qaraımyz. Medıasııa salasynda Qazaqstan halqy Assambleıasynyń, onyń qanaty astynda jumylǵan qoǵamdyq qurylymdar men azamattardyń atqaryp jatqan jumysy aýqymdy bolsa, róli de aıryqsha», degen ol tatýlyq pen kelisim baǵytynda óz úlesin qosyp júrgen medıasııa ınstıtýtynyń kókeıkesti máselelerin qarastyrýdyń mańyzdylyǵyna da toqtaldy.
«El Prezıdenti etnomedıasııa úshin kásibı kelissóz júrgizýshilerdiń formaty neǵurlym tıimdi bolyp tabylatynyn jáne Assambleıa osy baǵyttaǵy negizgi organ bolýy tıis ekenin atap ótti», degen QHA Tóraǵasynyń orynbasary medıasııa ınstıtýtynyń qyzmeti azamattardyń daý-janjaldaryn sheshý barysynda ymyraǵa kelýge daıyndyǵyn kórsetetin qoǵamdyq sanany jańǵyrtýdyń mańyzdy markerleriniń biri sanalatynyn atap kórsetti. «Sol sebepti de bul ınstıtýt qoǵamdyq turaqtylyqty jáne búkil áleýmettik qurylymnyń turaqtylyǵyn, qolaıly áleýmettik-psıhologııalyq klımatty qamtamasyz etedi, sondaı-aq qoǵamdaǵy quqyqtyq mádenıettiń deńgeıin arttyrady», dedi ol.
Elimizdiń qoǵamdyq-saıası kún tártibinde medıasııa ınstıtýtynyń erekshe oryn alatynyn atap ótken jıynǵa qatysýshylar qoǵamda týyndaǵan daýlar men janjaldardy sheshýdiń bul quralyn damytýǵa áleýmettik suranystyń joǵary ekenine erekshe mán berdi. Máselen, keńeste óńirlerdegi QHA qyzmetindegi medıasııa máseleleri boıynsha baıandama jasaǵan Aqparat jáne qoǵamdyq damý mınıstrligi «Qoǵamdyq kelisim» RMM Jobalardy iske asyrý jáne qurylymdarmen jumys basqarmasynyń basshysy Talshyn Italıeva birqatar mańyzdy túıitkildi talqyǵa saldy. Atap aıtqanda, ol medıatordyń biliktiligi, QHA-nyń kásibı resýrstarynyń jetkiliktiligi, qarajattyń maqsatty jumsalýy, etnosaralyq qaqtyǵystardyń aldyn alý daǵdylaryn damytýǵa qatysty ózekti máselelerdi ortaǵa tastady. «Daýlar men janjaldardy sheshý, azamattarǵa keńes berý boıynsha medıatorlar úlken jumys júrgizýde. Máselen, 2016 jyldan bastap 130 myńǵa jýyq ótinim kelip tústi, olardyń 39 paıyzyna keńes berilse, 61 paıyzynda medıatıvtik kelisim jasaldy», deıdi T.Italıeva.
Is-shara barysynda kelissóz júrgizýshi etnomedıatorlardy daıarlaý júıesin qalyptastyrý tásilderi, tıisti oqý baǵdarlamasyn ázirleý erekshelikteri, etnomedıatorlarǵa qoıylatyn talaptar, sondaı-aq Qazaqstan halqy Assambleıasy sheńberinde qoǵamdyq medıasııa ınstıtýtyn odan ári damytý perspektıvalary talqylandy. Qoıylǵan mindetterdi josparly jáne dáıekti iske asyrýǵa múmkindik beretin jumys pikirsaıystary ótkizilip, olardyń qorytyndylary da jan-jaqty sóz boldy.
Búginde elimizde QHA aıasynda 2 myńǵa jýyq qoǵamdyq medıator, 100-den astam kásibı medıator jumys isteıdi. О́ńirlerde 17 medıasııa kabıneti ashylsa, el kóleminde 300-den astam medıasııa alańy bar.