Almaty bıligi qoǵamdyq kólikte jolaqy qymbattaýy múmkin ekenin aıtty. Bul týraly brıfıngte qala ákiminiń orynbasary Serik Qusaıynov málimdedi, dep habarlaıdy Egemen.kz.
Onyń aıtýynsha, búginde Almatyda 151 qalalyq baǵyt bar. Onyń teń jartysyna «Almatyelektrotrans» kommýnaldyq kólik parki qyzmet kórsetedi. Qalǵan baǵyttar 20 jeke kompanııaǵa berilgen. Qusaıynovtyń aıtýynsha, tasymaldaýshylar tarıfterdi kóterý máselesin jıyn ótken saıyn kóteredi.
«Biz tarıfti erteń kóteremiz dep otyrǵan joqpyz. Biz jalpy bar máseleni aıtyp otyrmyz. Tarıfti kóterý kerek. Qazir 80 teńge. Eger biz tarıfti kóteretin bolsaq, qala turǵyndarymen aqyldasatyn bolamyz. Bul suraq óte ózekti. Sebebi tasymaldaýshylar maǵan tarıfterdi qashan kóteretinimiz týraly jıi suraıdy. Kóktemde bul máselege qoǵamdyq talqylaýlardan keıin oralamyz dep oılaımyn. Kelisimsiz baǵa kóterilmeıdi», dedi Qusaıynov.
Ol búgingi kúnge deıin qala ákimdigi tasymaldaýshylarǵa tóleıtin sýbsıdııalar men dotasııalar máselesin kótermegenin aıtty.
«Bul máselege osy jyldyń basynda tasymaldaýshylarǵa tóleıtin aqsha mólsherin kórgende ǵana nazar aýdardyq. Jylyna 40 mıllıard teńge tóleımiz. Bul eń úlken eldik kórsetkish. Birde-bir óńir Almatyda tasymaldaýshylarǵa bergendeı aqsha paıdalanbaıdy. Sondyqtan, qala bıýdjeti bundaı aqsha kólemimen kúrese almaıdy degen suraq týyndady», dep tolyqtyrdy ákimniń orynbasary.
Qusaıynov boljam boıynsha ákimdik aldaǵy ýaqytta jylyna 60-70 mıllıard teńgeden astam sýbsıdııa tóleýi tıis ekenin aıtty.
«Biz muny kótere almaımyz. Sondyqtan biz ekonomıkanyń úderisin túsinip, tereńdeı bastadyq. Biz sýbsıdııalar boıynsha esep aıyrysý prınsıpi bizge sáıkes kelmeıtinin kórdik. Bul ondaǵan jyldar buryn jasalǵan. Biraq qazir árbir tıyndy sanap, aqshany únemdeýge tyrysyp, kiris-shyǵysymyzdy muqııat eseptep otyrǵanda sýbsıdııalardyń úlken shyǵyn ekenin baıqadyq, óıtkeni 60-70 mıllıardqa ondaǵan mektep salýǵa, jańa avtobýstar satyp alýǵa bolady.
Sondyqtan biz Indýstrııa jáne ınfraqurylymdyq damý mınıstrligine sýbsıdııalardy esepteý prınsıpterinde suraqtar bar ekenin aıtyp hat joldadyq. Biz kelispeıtindigimizdi bildirdik jáne osy esepterdi qaıta qaraý úshin osy baǵytta jumys istep jatyrmyz», dep túıindedi sózin Serik Qusaıynov.
Almatyda búginde 2400-den astam qoǵamdyq kólik jumys isteıdi. Onyń ishinde 515 gazben júretin avtobýs, 196 trolleıbýs, 15 elektrobýs jáne 1715 dızeldi avtobýs bar. «Almatyelektrotrans» bıylǵy jáne aldaǵy jyldary gazben júretin 300 avtobýs satyp alýdy josparlap otyr. Sonymen qatar, jeke ınvestor 2025 jylǵa qaraı 500 mobıldi birlikke deıin arttyra otyryp, qalalyq marshrýttarǵa qyzmet kórsetý úshin 200-ge deıin gazben júretin avtobýstardy satyp alý, 2022 jyly jańa avtobýs parkin salý máselesin qarastyryp jatyr. Sondaı-aq 2022 jyly Alataý aýdanyndaǵy ındýstrııalyq aımaqta avtobýs parkiniń qurylysyn aıaqtaý jospary bar.
Naýryzbaı aýdanyndaǵy Abaı dańǵylyn tesý jumystary aıaqtalǵannan keıin kólik júıesine túsetin júktemeni azaıtýǵa jáne burynnan bar qalalyq baǵyttardyń bir bóligin túsirýge kómektesetin jańa marshrýttar uıymdastyrylady.