Sıntetıkalyq esirtki óndirisimen aınalysqan almatylyq 10 jylǵa bas bostandyǵynan aıyryldy, dep habarlaıdy Egemen.kz.
Almaty qalalyq sotynda habarlanǵandaı, Sh. esimdi kúdikti ınternet arqyly mefedron daıyndaý úshin reagentteri bar konstrýktorǵa tapsyrys berdi. Saty alynǵan komponentterdi 4 kúnge jalǵa alǵan páterge alyp kelip, odan ári satý úshin psıhotroptyq zattardy daıyndaı bastady.
«Jedel izdestirý is-sharalarynyń nátıjesinde Almaty qalasy polısııa departamentiniń esirtki bıznesine qarsy is-qımyl basqarmasynyń qyzmetkerleri jalǵa alynǵan páterdi tintý barysynda psıhotroptyq zattardy óndirýge arnalǵan jabdyqtar ǵana emes, salmaǵy 196,22 gramm mefedron esirtkisin de taýyp tárkiledi», delingen sot habarlamasynda.
Qalalyq sotta túsindirilgendeı, mundaı qylmys úshin QK-niń 297-babynyń 3-bóliginiń sanksııasy on jyldan on bes jylǵa deıingi merzimge bas bostandyǵynan aıyrý jazasyn qarastyrady.
«Almaty qalasynyń qylmystyq ister jónindegi mamandandyrylǵan aýdanaralyq sotynyń psıhotroptyq zatty ótkizý maqsatynda zańsyz daıyndaǵany, asa iri mólsherde saqtaǵany úshin sottalǵanǵa qatysty (QK-niń 297-babynyń 3-bóligi 3-tarmaǵy) 10 jylǵa bas bostandyǵynan aıyrý úkimin apellıasııalyq saty ózgerissiz qaldyrdy. Sottalýshynyń jeke basyn túzeý, jańa qylmystyq quqyq buzýshylyqtar jasaýdyń aldyn alý úshin qajetti jáne jetkilikti, onyń jeke basy, is-árekettiń sıpaty men qoǵamdyq qaýiptilik dárejesi týraly derekterdi eskere otyryp, 10 jyl bas bostandyǵynan aıyrý túrindegi jaza taǵaıyndaldy», dep naqtylady sotta.
Is apellıasııalyq satyda sottalǵan adamnyń jáne onyń advokatynyń apellıasııalyq shaǵymdary boıynsha qaraldy. Sot úkimi kúshine endi.