Qazaqstandyq boksshy Gennadıı Golovkın (41-1-1, 36 KO) Ulybrıtanııaǵa oralyp, ekinshi jekpe-jegin sol jerde ótkizýge daıyn ekenin málimdedi, dep habarlaıdy Egemen.kz Sports.kz-ke silteme jasap.
«Eger qyzyqty usynys týyndap jatsa, Ulybrıtanııada jekpe-jekke suranys bolsa, men ony qarastyrýǵa daıynmyn. Sebebi onda meniń jankúıerlerimniń eń úlken toby bar», dedi Golovkın.
Eske sala ketsek, 39 jastaǵy qazaqstandyq 2016 jyly Ulybrıtanııada jergilikti boksshy Kell Brýkpen (39-3, 27 KO) judyryqtasyp, besinshi raýndta qarsylasyn tehnıkalyq nokaýtpen jeńgen bolatyn.
Bastapqyda GGG-diń qarsylasy taǵy bir brıtandyq Krıs Iýbenk (31-2, 23 KO) bolýy kerek edi, biraq onymen kelissózder toqtap qaldy.