Jambyl atyndaǵy Qazaq memlekettik fılarmonııasynda ulttyq mádenıetke, dástúrli án ónerine ólsheýsiz úles qosqan maıtalman ánshi, sazger, kúıshi Manarbek Erjanovtyń 120 jyldyǵyna oraı «Án suńqar» atty konsert bolyp ótti, dep jazady Egemen.kz.
Biraz jyldar Jambyl atyndaǵy Qazaq memlekettik fılarmonııasynyń beldi solısi bolǵan Qazaqstannyń halyq ártisi Manarbek Erjanovtyń erekshe dombyra tartý tehnıkasy óskeleń urpaqqa únemi úlgi boldy. Án erkesi M.Erjanov ulttyq ónerdegi Arqa án dástúrinde óz mektebin qalyptastyryp, Jetisý ánderin naqyshyna keltire oryndaǵan. Onyń «Jetisý», «Shalqar kól», «Aqqý», «О́rnek», «Aqqyz», «Balalyq shaq», «Bı» atty kúıleri halyq arasyna keń taraǵan. Onyń shyǵarǵan kúılerine nazar aýdaryp, alǵash kásibı baǵasyn bergen akademık Ahmet Jubanov bolatyn. Án mádenıetindegi orny ózgeshe topjarǵan talantty erte tanyǵan A.Jubanov: «Manarbek Erjanovtyń kúıleri birinen biri asyp jatqan qazyna. Orkestrge, operalarǵa, baletterge, «meni túsir» dep suranyp turǵan, úlken sahnaǵa shyǵýdy ańsap turǵan shyǵarmalar» dep ánshiniń qanat qaǵyp samǵaýyna qoldaýyn bildirgen.
M.Erjanov 1953 jyldan ómiriniń sońyna deıin Qazaq memlekettik fılarmonııasynda jeke daýystaǵy ánshi bolyp, halyqtyń án ónerinde keń oryn alatyn terme, jyr, jeldirmelerdi, keń tynysty ánderdi, atap aıtsaq, «Ardaq», «Smet», Topaıkók», «Aǵashaıaq», «Janbota», «Balqadısha», «Aqqaıyń», «Tolybaı», «Qorlan», «Aqsısa» ánderin shabyttana shyrqaǵan.
Birjan-sal, Aqan Seri, Jarylǵapberdi, Estaı men Shashýbaı syndy birtýma daryndy tulǵalardyń ánshilik-sazgerlik mektebiniń izbasary bolǵan M.Erjanovtyń shyǵarmashylyq shabytynan týǵan mol án murasy halyqtyń qundy qazynasyna aınaldy. Dástúrli án óneriniń kóshin jalǵap júrgen kúmis kómeı, jeztańdaı ánshilerdiń qaı-qaısy da asqaq ánshige iltıpat tanytpaı ótken emes. Onyń rýhanı ıgilikke aınalǵan 150-den asa áni men kúıi halyq arasynda keńinen taralyp, óz oryndaýshysyn tapty. Leksııa-konsert pishininde ótken «Án suńqar» keshinde de myń qyrly Manarbektiń keń dıapazondy ánderi áýelep, avtorlyq shyǵarmalary sheberlikpen oryndaldy.
Keshti júrgizgen Manarbektiń izin jalǵastyrýshy, Qazaqstannyń eńbek sińirgen mádenıet qaıratkeri Dúısenbek О́mirálıev M.Erjanov ánderiniń shyǵý tarıhy, ereksheligi týraly baıandap, qyzyqty áńgimeniń tıegin aǵytty. Mádenıet qaıratkeri Erjan Álimbetov «Balalyq shaq», «Jeńgen soldat» kúıin oryndap, «Aqqýlar», Gúlim Alshynova Qalqanyń áni «Qalqany», respýblıkalyq baıqaýlardyń laýreaty Amangeldi Kúzeýbaı «Paravoz», Madına Sháripova «Baqyt jyry», Qazaqstannyń Mádenıet salasynyń úzdigi Tileýles Qurmanǵalıev «Amangeldi týraly ándi», Halyqaralyq baıqaýlardyń laýreattary Maqpal Qazybekqyzy «Saıra, bulbul», Esbol Shańbaı «Smetti», Qazaqstannyń eńbek sińirgen qaıratkerleri Erkin Shúkiman Estaıdyń «Qorlanyn», Ramazan Stamǵazıev Jarylǵapberdiniń «Ardaǵyn» áýeletip, taýdyń móldir tunbasyndaı saf ónerdiń jaýharymen tyńdaýshy qaýymnyń janyn terbedi. Manarbek Erjanovtyń 120 jyldyq mereıtoıyna arnalǵan leksııa-konsert máresine jetkende, dástúrli ónerdiń týyn jelbiretip júrgen maıtalman ánshilerge halyqtyń qoshameti asa joǵary boldy.
Ári ánshi, ári kompozıtor, kúıshi, akter, ári opera sahnasynyń sańlaǵy Manarbek Erjanov óz ómirindegi jetistikterdiń bıik shyńynan kóringen biregeı tulǵa. Sahna serkesiniń shyqqan shyńy ýaqytpen birge bıiktep, jarqyraı túseri de sózsiz.