Qazaqstannyń Tuńǵysh Prezıdenti – Elbasy kitaphanasy mýzeıinde Elbasynyń jeke toptamasyndaǵy jádigerler, memleket basshylary men olardyń resmı ókilderiniń syılyqtary, óner týyndylary jáne máni zor tarıhı qundylyqtar jınaqtalǵan. Biz osy joly mýzeıdiń «Dańq» galereıasyndaǵy ekspozısııasyn sóıletsek deımiz. Onda Tuńǵysh Prezıdentimizdiń jetekshiligimen júzege asqan Qazaqstannyń jahandyq saıasatynyń dálelderi jınaqtalyp, 50-den asa qoǵamdyq jáne joǵarǵy memlekettik nagrada ornalasqan.
Elbasy elimiz egemendik alǵannan keıin syrtqy saıasatta salıqaly baǵyt ustanyp, álemniń kóptegen memleketimen salmaqty baılanys ornatty. Bul endi azattyq alyp, eńsesin tiktep, jańasha damý jolyna túsken Qazaqstanǵa tyń serpin berdi. Sondyqtan da syrtqy saıasatymyzdy qalyptastyrýda Nursultan Nazarbaevtyń eńbegi zor, sony shet memleket basshylary da joǵary baǵalaǵan. Aıtalyq, 2000 jyly 29 aqpanda Vena qalasynda Aýstrııa prezıdenti Tomas Klestıl Elbasyny eki el arasyndaǵy dostyq baılanysty nyǵaıtýǵa qosqan úlesi úshin Aýstrııanyń joǵary nagradasy «Aýstrııa respýblıkasyna sińirgen eńbegi úshin Úlken Qurmet Juldyzy» ordenimen marapattasa, Lıtva Respýblıkasy I dárejeli «Uly Vıtaýtas» ordenin tabys etken.
2002 jyly 24 mamyrda Varshava shaharynda Tuńǵysh Prezıdentimizge Polsha Respýblıkasynyń joǵary nagradasy «Aq qyran» ordeni tabystalǵan. Aıtýly marapatty 1705 jyly 1 qarashada Polsha koroli II Avgýst bekitken, oǵan ıe bolǵandar qatarynda – Rım Papasy II Ioann Pavel, Ulybrıtanııa patshaıymy II Elızaveta, Fransııa prezıdenti Jak Shırak, GFR kansleri Gelmýt Kol, Chehııa prezıdenti Vaslav Gavel, Lıtva prezıdenti Algırdas Brazaýskas bolsa, osy biregeı tulǵalardyń arasynda Nursultan Nazarbaevtyń esimi atalǵany júrekke jylylyq uıalatady.
1997 jyly Italııa prezıdenti Lýıdjı Skalfaro Elbasyn «Úlken lentamen kómkerilgen Úlken Krest Iegeri» ordenimen marapattasa, Belgııa koroli, mártebeli II Alberttiń jarlyǵymen Nursultan Nazarbaevqa osy eldiń joǵary marapaty – Úlken Krestiń omyraý juldyzy bar, I Leopold Ordeniniń Úlken lentasy tabys etilgen. Bul nagrada Belgııanyń jáne shet memleketterdiń eń ataqty memlekettik qaıratkerlerine beriledi.
Sondaı-aq Fransııa basshysy atynan áskerı nemese azamattyq eńbegi úshin beriletin joǵarǵy nagradasy «Qurmetti legıonnyń úlken kresi» ordeni nazarymyzdy aýdardy. Atalǵan orden 1802 jyly 19 mamyrda Napoleon Bonaparttyń jarlyǵymen bekitilgen. 2011 jyly 11 maýsymda Nursultan Nazarbaevtyń Fransııaǵa resmı sapary barysynda eki el arasyndaǵy dostyq qarym-qatynastardy damytýǵa qosqan úlesi úshin sol memlekettiń basshysy Elbasyn «Qurmetti Legıon» ordenimen marapattaǵan. Sonymen birge Tuńǵysh Prezıdentimizge Majarstan Respýblıkasynyń joǵary nagradasy «Alqaly úlken krest» ordeni tabys etilgen.
Al Reseı Federasııasynyń joǵary marapaty «Áýlıe Apostol Andreı Pervozvannyı» ordeni de kórnekti memleket jáne qoǵam qaıratkerleri men shet memleketter men úkimet basshylaryna beriledi. 1998 jyly sol kezdegi RF Prezıdenti B.N.Elsın «Áýlıe apostol Andreı Pervozvannyı» ordenin Reseıdiń joǵary memlekettik nagradasy retinde qalpyna keltirgen. Onyń alǵash ıegeri akademık D.Lıhachev bolsa, ekinshisi – atý qarýynyń ataqty konstrýktory M.Kalashnıkov. Bizdiń Elbasy atalǵan ordenniń úshinshi ıegeri. Onymen Tuńǵysh Prezıdentimizdi Borıs Elsın 1998 jyly 12 qazanda marapattaǵan.
Sonymen qatar Mysyr Arab Respýblıkasynyń joǵary nagradasy «Uly Nil ordeni» 2008 jyly 17 mamyrda Nursultan Nazarbaev Sharm-ál-Sheıh qalasynda ótken Dúnıejúzilik ekonomıkalyq forýmǵa barǵanda tabystalǵan. Mysyr Arab Respýblıkasynyń bul joǵary nagradasymen ekijaqty qarym-qatynastardy damytýǵa qosqan zor úlesi úshin memleket basshylary ǵana marapattalady.