UFC-diń eki salmaqtaǵy burynǵy chempıony Konor Makgregordyń burynǵy bapkeri Djon Kavana shákirtin jaraqaty jazylǵannan keıin kimderge qarsy segiz buryshtan kórgisi keletini týraly oıymen bólisti, dep habarlaıdy Egemen.kz.
«Shynymdy aıtsam Neıt Dıazǵa qarsy trılogııa ótkizgimiz keledi. Bul shaıqas óte qyzyq bolady dep oılaımyn. Ol soqqysy soıqan sportshy. Jankúıerler sondaı kezdesýlerdi jaqsy kóredi. Konor men Tonı Fergıýson arasyndaǵy shaıqas týraly da ýaqytynda az aıtylǵan joq. Tonı áli de óziniń myqty ekenin dáleldegisi keledi. Sondyqtan oǵan qarsy Konor qýana-qýana shyǵady. Jeńil salmaqta myqty sportshylar jetkilikti. Den Hýker, Islam Mahachev sekildi sańlaqtarmen de keremet jekpe-jek uıymdastyrýǵa bolady. Sondaı-aq Charlz Olıveıra men Dastın Pore arasyndaǵy kezdesýdiń jeńimpazymen de segiz buryshty bólisýge daıynbyz», deıdi bapker.
Sońǵy derekterge sensek, ırlandııalyq Konor Makgregor sáýir aıynda oktagonǵa oralaýy múmkin.