Búgin Senat Tóraǵasy Máýlen Áshimbaevtyń tóraǵalyq etýimen Palatanyń otyrysy boldy. Onda senatorlar elimizdiń sot júıesin odan ári reformalaýǵa baǵyttalǵan zańdar qabyldady, dep habarlaıdy Egemen.kz.
Endi sot júıesine quqyqtyń tar aıadaǵy salalary boıynsha bilikti mamandardy tartý jónindegi ereje zańnamalyq turǵydan bekitiledi. Ol úshin úmitkerler mamandandyrylǵan biliktilik emtıhanyn tapsyryp, bólek konkýrstan ótýge tıis.
«Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýsııalyq zańyna ózgerister men tolyqtyrýlar engizý týraly» Konstıtýsııalyq zańda osy jáne basqa da jańashyldyqtar kórinis tapqan.
Sýdıalardyń bos laýazymdaryna kandıdattardy taǵaıyndaý máselelerin qaraý jónindegi Joǵary Sot Keńesiniń ókilettikteri de keńeıtiledi.
Senatorlar ol erejelerge qoldaý bildirdi jáne «Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» Zań Palata otyrysynda eki oqylymda qabyldandy.
Sonymen qatar senatorlar Memleket basshysy azamattyq prosesti jeńildetý jónindegi buryn maquldaǵan tásilderdi iske asyrýǵa, sondaı-aq tatýlastyrý rásimderin qoldaný salasyn keńeıtýge baǵyttalǵan zań jobasyna da bastamashy bolǵan edi. Búgin qabyldanǵan «Qazaqstan Respýblıkasynyń keıbir zańnamalyq aktilerine azamattyq prosestik zańnamany jetildirý jáne daýlardy sottan tys jáne sotqa deıingi retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zań osyǵan arnalyp otyr. Bul zań medıatorlardyń quqyqtary men mindetterin naqtylaıdy, onlaın-medıasııany damytýǵa yqpal etedi. Sonymen qatar álemdik tájirıbedegi «úlgili sot sheshimi» ınstıtýtyn beıimdeý usynylady jáne taraptarǵa aýmaqtan tys sottalýdy tańdaý quqyǵy beriledi. Bul qaǵıdanyń máni-jaıy – IT arnaıy baǵdarlamasy isti bir sottyń ishinde emes, búkil eldegi sottardyń arasynda olardyń mamandanýy men jumys júktemesin eskere otyryp avtomatty túrde taratady. Bul rette aýmaqtan tys sottalý jaǵdaıy eki taraptyń kelisimimen ǵana tańdalady.
Qabyldanǵan zańdar jóninde pikir bildirgen Máýlen Áshimbaev jańa normalardyń sot júıesin odan ári damytý úshin mańyzdy ekenin atap ótti.
«Búgin qabyldanǵan zańdar Memleket basshysynyń sot júıesin jetildirýge arnalǵan bastamalaryn iske asyrý úshin ázirlendi. Parlament depýtattary bastamashyl bolǵan zańdar elimizdegi sot júıesin odan ári jańǵyrtýdy kózdeıdi. Sýdıa laýazymyna úmitkerlerdi irikteý júıesin jáne sýdıalardy konkýrstyq irikteý tetikterin jetildiredi. Jańa normalar sot júıesinde zamanaýı tehnologııalardy keńinen paıdalanýǵa da múmkindik beredi. Joǵarǵy Sottyń plenarlyq otyrysynyń jáne Joǵary Sot Keńesi otyrysynyń quziretterin keńeıtedi», dedi Senat Tóraǵasy.