Atyraý oblysyndaǵy bir azamatqa lańkestik uıymdy qarjylandyrdy degen kúdik keltirildi. Bul týraly «Astana» telearnasy habarlady.
Oblystyq qarjy polısııasynyń deregine júginsek, álgi aıypker «Islam Djıhat Odaǵy» uıymyna aldymen 2 myń, keıin 3 myń dollar aýdarǵan kórinedi. Shetelge atalǵan somany «BTA Banki» Atyraý fılıalynyń «Western Union» banktik aýdarym qyzmeti arqyly jiberipti. Qarjy Azızýllah degen azamatqa joldanǵan eken. Osyǵan baılanysty, kúdiktige terrorızmdi jáne ekstremızmdi nasıhattaý baby boıynsha qylmystyq is qozǵaldy.
«Atyraýlyq azamatqa banktik aýdarym arqyly dollardy shetelge jiberý jolymen halyqaralyq terrorıstik uıymdy qarjylandyrdy degen kúdik keltirildi. Qazir osyǵan qatysty qylmystyq is tergelýde. Al ózge aqparat tergeý múddesine baılanysty jarııalanbaıdy», - dedi Atyraý oblysy boıynsha ekonomıkalyq qylmysqa jáne sybaılas jemqorlyqqa qarsy kúres departamentiniń aǵa tergeýshisi Dýlat Madııarov.
Ámirhan Almaǵanbetov.
Derekkóz: «Astana» telearnasy.
Foto: Ria.ru.