Bıyl elimiz úshin mereıli mereke: Táýelsizdiktiń 30 jyldyǵy. 1991 jyly egemendigin jarııalap, shekarasyn shegendegen Qazaqstannyń búginge deıingi ósý jolynda túrli oqıǵalar, bastamalar men úlken sheshimder boldy. Jeke memleket retinde qaıta qalyptasýdyń alǵashqy kezeńi elimiz úshin ońaıǵa soqqan joq. Sondyqtan táý eter táýelsizdiktiń bergeni men bererin baǵamdap, ótken otyz jyldaǵy jetistikterdi saralaý – búgingi merekeniń negizgi maqsaty bolyp otyr. Álqıssa.
О́ńir-óńirde el Táýelsizdiginiń 30 jyldyǵyna arnalǵan túrli is-shara uıymdastyrylýda. Osy oraıda elordada Qazaqstan Respýblıkasy Qarýly Kúshteri Ulttyq áskerı-patrıottyq ortalyǵy Ortalyq áskerı orkestriniń solısi, Qazaqstannyń Eńbek sińirgen qaıratkeri, kapıtan Qaıyrjan Berdibaıdyń «Táýelsizdik – tuǵyrym» atty shyǵarmashylyq konserti ótti. Qaıyrymdylyq maqsatynda ótken keshke Nur-Sultan qalasynyń «Sharapat» Qarttar úıinen kórermender kelip qatysty.
Kesh avtorynyń aıtýynsha, qaıyrymdylyq keshin ótkizý jospary bir kezdegi Qarttar úıindegi konsertten týyndaǵan eken.
«Konserttiń negizgi maqsaty – qarttarymyzdyń júregine jylylyq syılap, kóńilderin kóterý. Aldaǵy jyly Balalar úıiniń balalaryna da osyndaı kesh ótkizsem deımin. Sol jerdegi ónerli balalardy da sahnaǵa shyǵarý oıda bar. Odan bólek múgedek jandarǵa da qaıyrymdylyq keshin ótkizý josparda tur», deıdi ánshi.
Árbir tarıhı dáýirdiń ózindik mádenıeti bolatyny sekildi ár halyqtyń ózine tán dástúrleri bar. Ata dástúrden jalǵasqan ulttyq aspaptyq mýzyka halqymyz úshin erekshe oryn alady. Shyǵarmashylyq keshti súıemeldegen Erkeǵalı Rahmadıev atyndaǵy memlekettik akademııalyq fılarmonııasynyń Qazaq orkestriniń ónerin tamashalap otyryp, osy oıǵa taǵy da bekı túsesiń. Aıta keteıik, orkestrdiń bas dırıjeri – Qazaqstannyń Mádenıet qaıratkeri Nurlan Bekenov boldy.
Qaıyrymdylyq keshinde Abaı, Sáken, Ilııa Jaqanov, Rýdolf Folva, Aleksandr Zasepınniń – barlyǵy on segiz án oryndaldy. Aıta keteıik, konsertte Qazaqstannyń Eńbek sińirgen qaıratkerleri Seken Turysbek, Jeńis Ysqaqova, Ramazan Stamǵazıev pen Qazaqstan Respýblıkasy Qarýly Kúshteriniń Ulttyq áskerı-patrıottyq ortalyǵy Ortalyq ansambliniń hory óner kórsetti.
«Konsertti Juban Moldaǵalıevtiń rýhty oıatatyn «Men qazaqpyn» ánimen bastaýymnyń óz sebebi bar. Juban Moldaǵalıev – Kolbınge qarsy sóılegen qazaqtyń batyr, birtýar azamaty. Budan bólek oryndalǵan barlyq án qazaq qulaǵyna sińgen, júreginen oryn alǵan shyǵarmalar. Jalpy, aldaǵy ulyq mereke – el Táýelsizdiginiń 30 jyldyǵy qarsańynda qazaq óneriniń injý-marjan shyǵarmalaryna aınalǵan ánderdi halyqqa usynyp, rýhyn oıatyp, patrıottyq sezim uıalatatyn kesh ótkize alǵanyma qýanyshtymyn. Bul, árıne, eń aldymen el egemendiginiń arqasy», deıdi ánshi.
Qaıyrjan Berdibaıdyń repertýarynda Ilııa Jaqanov, Seken Turysbek, Muqan Tólebaev, Keńes Dúısekeev, Israıl Saparbaı, Marat Ilııasov, Qapan Mýsın syndy basqa da kompozıtorlardyń ánderi, sondaı-aq sheteldik shyǵarmalar da bar. Ol buǵan deıin Abaı atyndaǵy qazaq memlekettik akademııalyq opera jáne balet teatrynda óner kórsetken. «Qyz Jibek» operasynda Shegeniń rólinde oınaǵan, sondaı-aq «Rıgoletto», «Travıata», «Aıda» operalarynda shaǵyn partııalardy oryndaǵan. Keıin áskerı qyzmetke ketken soń repertýarynda kóbinese patrıottyq ánder jınalǵan.
«Áskerı orkestrdiń solısti bolǵandyqtan, túrli jaǵdaılarda án shyrqaýǵa týra kelip jatady. Máselen, álem elderiniń delegasııalary Qazaqstanǵa resmı saparmen kelgende mindetti túrde sol ulttyń ánderi oryndalady. Sondyqtan mundaı jaǵdaılarǵa da árdaıym daıyn júremiz», deıdi Q.Berdibaı. Sondaı-aq kelesi jyly Ilııa Jaqanovtyń, Israıl Saparbaıdyń, Seken Turysbektiń shyǵarmashylyq keshin jáne Keńes Dúısekeevti eske alý keshin josparlap júrgenin aıtty.