Ulttyq Olımpıadalyq komıtettiń uıymdastyrýymen elordadaǵy Kongress ortalyǵynda Qazaqstan Táýelsizdiginiń 30 jyldyǵyna arnalǵan «Altyn Samǵaý-2021» júldesin saltanatty túrde tapsyrý rásimi ótti. Jıynǵa Premer-Mınıstr Asqar Mamın, Premer-Mınıstrdiń orynbasary Eraly Toǵjanov, Mádenıet jáne sport mınıstri Aqtoty Raıymqulova jáne Qazaqstan UOK basshysy Tımýr Qulybaev bastaǵan sportshylar men jattyqtyrýshylar jáne sport ardagerleri qatysty.
Pandemııaǵa baılanysty shekteýlerge oraı, jyldyń sporttyq oqıǵalaryn qorytyndylaǵan is-shara elimizdiń úsh qalasy – Nur-Sultan, Almaty jáne Túrkistannan onlaın kórsetilim arqyly bir mezgilde ótti.
Saltanatty jıynda sóz alǵan Premer-Mınıstr Asqar Mamın Qazaqstan Táýelsizdiginiń 30 jyldyǵymen quttyqtap, memleket sportshylarǵa árdaıym qoldaý kórsetetinin aıtsa, Premer-Mınıstrdiń orynbasary Eraly Toǵjanov el namysyn qorǵap júrgen sportshylarǵa alǵysyn jetkizdi. Al Mádenıet jáne sport mınıstri Aqtoty Raıymqulova egemendik alǵaly elimizde birneshe sport nysany paıdalanýǵa berilgenin, sol sport keshenderinen bolashaq Olımpıada chempıondary shyǵatynyna senimdi ekenin jáne osyndaı jetistikke táýelsizdiktiń arqasynda qol jetkizilip otyrǵanyn aıtty. UOK basshysy Tımýr Qulybaev sportshylardyń tabysy men jeńisin maqtan etetinin, olardyń jetistigi jas urpaqqa úlgi bolatynyn atap kórsetti.
Sonymen, elimizdiń túkpir-túkpirinen jankúıerler 22 qarasha men 6 jeltoqsan aralyǵynda ózderiniń súıikti sportshylaryn Olympic.kz saıtynda daýys berý arqyly anyqtady.
«Úzdik sportshy» jáne «Úzdik sportshy qyz» atalymynda qysqy jáne jazǵy sport túrlerinen tórt jeńimpaz tańdaldy. Tokıo-2020 Olımpıadasynyń qola júldegeri, álem chempıony Sáken Bıbosynov, karateden Tokıo-2020 Olımpıadasynyń jáne álem chempıonatynyń qola júldegeri Sofıa Berýlseva, sondaı-aq short-trekten Álem kýbogy kezeńderiniń júldegeri Denıs Nıkısha men frıstaıl-mogýldan álem chempıonatynyń júldegeri Iýlııa Galysheva júlde ıegerleri atandy.
Qysqy sport túrlerindegi komandalar búginde 2022 jylǵy Beıjiń Olımpıadasyna daıyndalý ústinde. Sol sebepti saltanatty is-sharaǵa qatysa alǵan joq.
«Úzdik jattyqtyrýshy» ataǵyna bokstan Tokıo Olımpıadasynyń qola júldegeri, álem chempıony Sáken Bıbosynovtyń jeke jattyqtyrýshysy Myrzaǵalı Aıtjanov pen short-trekten Qazaqstan komandasynyń bas bapkeri Mádiǵalı Qarsybekov jazǵy jáne qysqy sport túrleri boıynsha laıyq dep tanyldy.
«Jyldyń úzdik komandasy» atalymyna bıyl álem chempıonatynyń jartylaı fınalyna deıin shyǵyp, tórtinshi orynǵa taban tiregen fýtzaldan Qazaqstan quramasy laıyq dep tanyldy. Al «Jyl jańalyǵy» nomınasııasynda karateden Tokıo Olımpıadasyna qatysýshy ári álem chempıonatynyń qola júldegeri Nurqanat Ájiqanov top jardy. Nurqanat álem birinshiliginde komandalyq synda da qola júlde jeńip alǵanyn eske sala keteıik.
«Úzdik aımaq» atalymynda ózgerister bar. Bıyl uıymdastyrýshylar olımpıadalyq sport túrleri boıynsha 36 ulttyq federasııaǵa tizgin berip, úzdik aımaqty federasııa ókilderi anyqtady. О́te tartysty ótken daýys berý nátıjesinde Almaty qalasy Almaty oblysyn bir upaı basymdyǵymen utyp, jeńiske jetti.
«Úzdik ulttyq sport federasııasy» atalymynda Tennıs federasııasy top jardy. Jeńimpazdy Qazaqstannyń UOK janynan qurylǵan arnaıy komıssııa anyqtap, atalǵan federasııa barlyq talap boıynsha úzdik shyqty.
Paralımpıadalyq sport túrleri boıynsha «Úzdik sportshy» bolyp paýerlıftıngten Tokıo-2020 Paralımpıadalyq oıyndarynyń jeńimpazy Davıd Degtıarov tanyldy. Al paralımpıadalyq sport túrleri boıynsha «Úzdik jattyqtyrýshy» ataǵyna paradzıýdodan Qazaqstan komandasynyń bas bapkeri Jandos Qııanov qol jetkizdi. Onyń úsh shákirti – Ánýar Sarıev, Dáýlet Temirjanov jáne Zarına Baıbatına Tokıo-2020 Paralımpıada oıyndarynda úsh kúmis medal jeńip alǵan.
Jyldyń sporttyq oqıǵasyn qorytyndylaǵan keshte qazaqstandyq atletterdi barlyq jattyǵý jıyndary men jarystarǵa bastap aparatyn keshendi-ǵylymı top músheleri de eskerýsiz qalǵan joq.
«Sporttyq medısına boıynsha úzdik maman» nomınasııasy dáriger Azamat Nurmatovqa berildi. Ol Tokıo-2020 oıyndarynda medısınalyq shtabtyń bas dárigeri retinde jumys istedi, sondaı-aq Olımpıadaǵa daıyndyq kezinde sportshylardyń qaýipsizdigin saqtaý jónindegi toptyń quramynda boldy.
Ulttyq Olımpıadalyq komıtettiń arnaıy dástúrli júldesi – «Qazaqstan sportynyń maqtanyshy» otandyq sporttyń damýyna ólsheýsiz úles qosyp, bolashaq chempıondarǵa úlgi atanǵan sportshylar men qaıratkerlerge tapsyrylady. Bıyl bul júlde grek-rım kúresinen Máskeý Olımpıadasynyń jeńimpazy, álem chempıony Jaqsylyq Úshkempirovke berildi. Júldeni dańqty balýannyń uly, búginde ákesiniń atyndaǵy sport keshenin basqaryp otyrǵan Jandos Úshkempirov aldy.
Marapattaý rásiminiń sońy konserttik baǵdarlamaǵa ulasty.