Atyraý oblysynyń ákimi Mahambet Dosmuhambetov orynbasary Baqytgúl Hamenovanyń qamaýǵa alynǵanyn estip, renjigenin aıtty, dep habarlaıdy Egemen.kz.
«Hamenovanyń ornyn eshkim alǵan joq. Onyń qyzmeti ákimniń orynbasarlary arasynda bólingen. Tergeý júrip jatyr, tergeýden keıin bári belgili bolady. Men túsinikteme bere almaımyn, qazir tergeý júrip jatyr», dedi Dosmuhambetov úkimet otyrysynan keıin jýrnalıster suraǵyna jaýap berip.
Hamenovanyń ustalǵanyn estigende «árıne, renjidim» dedi oblys ákimi.
Ol qamaýǵa alynǵannan keıin Hamenovamen baılanyspaǵanyn jáne quqyq qorǵaý organdary ony jaýap alýǵa shaqyrmaǵanyn túsindirdi.
Ákim jaqyn arada qyzmetten ketetini týraly qaýesetterge de jaýap berdi.
«Mende ondaı aqparat joq, estigen joqpyn. Bul máseleni retteıtin zań bar. Eger orynbasarlarymnyń sybaılas jemqorlyq jasaǵany anyqtalsa, onda zańǵa sáıkes men otstavkaǵa ketýim kerek. Al ony Memleket basshysy qabyldaıdy», dedi Dosmuhambetov.
Onyń aıtýynsha, sybaılas jemqorlyq daýynan keıin Atyraýda Abaı eskertkishin ornatý jumystary keıinge shegerilýi múmkin.
«Eskertkish týraly sheshim, qatelespesem, 2016 jyly qabyldanǵan. Pandemııa kezinde jumysty júrgize almadyq, eskertkishti bıyl ornatý josparda bar edi. Endi ýaqyty sozylýy múmkin nemese sozylmaıdy. Tergeý áser etedi me, aıta almaımyn», dep jaýap berdi ákim.