Manash Qozybaev atyndaǵy Soltústik Qazaqstan ýnıversıtetiniń professory, belgili abylaıtanýshy Zarqyn Taıshybaı Táýelsizdiktiń 30 jyldyǵyna arnap «Abylaı han tarıhy» atty 3 tomdyq jınaq shyǵardy, dep habarlaıdy Egemen.kz.
Onda uly hanǵa qatysty Reseı arhıvteri men Qazaqstan qalalaryndaǵy hanǵa qatysty arhıv materıaldary toptastyrylǵan. Bul – ǵalymnyń kóp jyldyq eńbeginiń nátıjesi. Bolashaq abylaıtanýshylar arhıv shańdaryn jutpaı, bir kitapqa shoǵyrlandyrylǵan hanǵa qatysty málimetterdi osy jınaqtan taba alady.
Búgin Qyzyljar qalasyndaǵy eń úlken mádenıet orny sanalatyn Jasóspirimder saraıynda kitaptyń tusaýkeser rásimi bolyp ótti. Ony ýnıversıtet rektory Erlan Sholanov ashyp júrgizip otyrdy. Oblys ákiminiń orynbasary Ǵanı Nyǵmetov oblys ákiminiń quttyqtaý hatyn oqydy jáne eńbektiń mańyzdylyǵyna toqtalyp ótti.
«Myńnan artyq qujattyń basyn quraǵan eńbektiń tanymdyq mańyzy asa zor bolmaq. Olar uly hanymyzdy búgingi jáne bolashaq urpaqqa jan-jaqty tanytady», dedi ol óziniń sózinde. Eńbektiń mańyzdylyǵy jóninde SQÝ rektorynyń keńesshisi, tarıh ǵylymdarynyń doktory Aqmaral Ybyraeva, oblystyq arhıvtiń dırektory Sáýle Málikova, tarıh ǵylymdarynyń kandıdaty Sáýle Qartova, «Rýhanı jańǵyrý» zertteý ınstıtýtynyń basshysy Gúlnál Ahmetjanova jáne ózgeler aıtyp ótti.
Kitaptyń tusaýyn oblys ákiminiń orynbasary Ǵanı Nyǵmetov, oblysqa belgili azamattar Qudaıbergen Qalıev, Jomart Omarov, Naǵashybaı Barlybaev, Kemel Ospanov kesti.
QYZYLJAR