Elimizde azamattyq qorǵaý organdarynyń qulaqtandyrý júıesi tekseriledi, dep habarlaıdy Egemen.kz.
21 jeltoqsanda saǵat 9.00-den 12.00-ge deıin azamattyq qorǵaýdyń qulaqtandyrý júıesine respýblıkalyq tekserý júrgizý josparlanǵan.
Tótenshe jaǵdaılar týraly halyqty qulaqtandyrý jáne habardar etý - turǵyndardy tabıǵı qubylystardyń ártúrli faktorlarynyń áserinen bolatyn apattyń nemese joıqyn áserdiń teris saldarynan qorǵaýǵa múmkindik beretin negizgi qaýipsizdik sharasy.
Qulaqtandyrý júıesin tekserý barysynda elektr dabyldaryn jáne sırenalyq-sóıleý qurylǵylaryn (daýys zoraıtqyshtardy) qysqa merzimge qosý, sondaı-aq teledıdar jáne radıoarnalarynyń efıri arqyly habarlaý, ınternet-resýrstary men mobıldi qosymshalarda aqparatty ornalastyrý josparlanǵan. «Barshanyń nazaryna!!!» dybystyq sıgnaly - qaýip tóngen nemese tótenshe jaǵdaı týyndaǵan kezde barlyq shuǵyl habarlamalardy berýdiń aldynda halyqtyń nazaryn aýdarý úshin beriletin eskertý dabyly.
Dybystyq sıgnaldy estigen kezde teledıdarlar men radıoqabyldaǵyshtardy qosý kerek. Internet resýrstardaǵy jáne mobıldi qosymshalardaǵy aqparattardy apat týyndaǵan jaǵdaıda odan ári áreket etý týraly nusqaýlar alý úshin oqyp shyǵý kerek.
Sonymen qatar, qaýipti óndiristik obektiler men gıdrotehnıkalyq qurylystardaǵy jergilikti qulaqtandyrý júıeleriniń jaramdylyǵy tekseriledi. Qulaqtandyrý júıesine respýblıkalyq tekserý júrgizý qulaqtandyrý jabdyǵyn ázirlikte ustaýǵa jáne halyqty yqtımal tótenshe jaǵdaılardan qorǵaýǵa baǵyttalǵan.