Memleket basshysy Qasym-Jomart Toqaevtyń atyna Qazaqstan Respýblıkasy Táýelsizdiginiń 30 jyldyǵyna oraı shet memleketterdiń basshylarynan jáne halyqaralyq uıymdardyń jetekshilerinen quttyqtaý hattary men jedelhattar áli de kelip jatyr, dep jazady Egemen.kz Aqordaǵa silteme jasap.
Túrkııa Prezıdenti Rejep Taıyp Erdoǵan jeke óziniń jáne túrik halqynyń atynan shynaıy quttyqtaýyn joldady.
«Tarıhı, mádenı jáne baýyrlastyq baılanystarymyz ortaq Qazaqstanmen aradaǵy strategııalyq seriktestigimizdiń ekijaqty, aımaqtyq jáne halyqaralyq deńgeıde tereńdep, nyǵaıyp kele jatqanyna qýanyshtymyn», delingen jedelhatta.
Ýkraına Prezıdenti Vladımır Zelenskıı quttyqtaý hatynda Qazaqstan Táýelsizdik jyldarynda óz pozısııasyn nyǵaıtyp, halyqaralyq arenada laıyqty oryn alǵanyn jazǵan.
«Elderimizdiń kópqyrly jáne ekijaqty yntymaqtastyqty odan ári damytyp, memlekettik egemendik pen aýmaqtyq tutastyqty ózara qoldaıtynyna, Qazaqstan Ýkraınanyń Ortalyq Azııadaǵy senimdi seriktesi bolyp qala beretinine senimdimin», delingen Ýkraına basshysynyń jedelhatynda.
Shveısarııa Prezıdenti Gı Parmelan óziniń quttyqtaýynda Qasym-Jomart Toqaevpen Jenevada jýyrda ótken ekijaqty kelissózderdi joǵary baǵalaǵan.
«Bizdiń kezdesýimiz ben qol qoıylǵan kelisimderdiń ekijaqty yntymaqtastyǵymyzǵa aıtarlyqtaı paıdasy tıetinine senimdimin. Osy múmkindikti paıdalana otyryp, qarym-qatynastarymyzdy odan ári damytýǵa Shveısarııanyń beıildi ekenin naqtylaımyn», delingen jedelhatta.
Italııa Prezıdenti Serdjo Mattarella Nur-Sultan men Rımdi saıası, ekonomıkalyq, mádenı baılanystar biriktiretinin jáne bul qatynastardyń bolashaqqa birge qadam basýǵa, ekijaqty ózara is-qımyldy damytýǵa jol ashatynyn atap ótken.
«Elderimiz arasyndaǵy, sonyń ishinde Qazaqstan men Eýropalyq Odaq arasyndaǵy dıalog aıasynda qarqyndy yntymaqtastyǵymyz Ortalyq Azııadaǵy turaqtylyq pen ornyqty damýǵa septigin tıgize beretinine senimdimin», delingen Italııa Prezıdentiniń quttyqtaýynda.
Majarstan Prezıdenti Iаnosh Ader Qazaqstannyń otyz jyl ishinde kóptegen sala boıynsha aıtarlyqtaı jetistikterge qol jetkizgenin jáne búginde Ortalyq Azııa aımaǵynda mańyzdy ról atqaryp otyrǵanyn atap ótken.
«Majarstan eki el arasyndaǵy dostyq qatynastardy nyǵaıtýǵa beıildi. Strategııalyq seriktestigimiz buǵan negiz bolady. Sonymen qatar Túrki memleketteri uıymy aıasyndaǵy yntymaqtastyǵymyz ózara tyǵyz baılanystarymyzdy odan ári nyǵaıtýǵa jol ashady», delingen Iаnosh Aderdiń jedelhatynda.
Aljır Prezıdenti Ábdelmadjıd Tebbýn óziniń quttyqtaý hatynda elimizde dıplomatııalyq ókildik ashý jáne Qazaqstan astanasynda alǵashqy Aljır elshisin taǵaıyndaý jóninde bastama kótergen.
Kanadanyń General gýbernatory Merı Saımon Qasym-Jomart Toqaevty jáne Qazaqstan halqyn el Táýelsizdiginiń 30 jyldyǵymen quttyqtap, Qazaqstannyń áleýmettik-ekonomıkalyq ál-aýqatyn jaqsartýǵa, memlekettik basqarý isi men zań ústemdigin nyǵaıtýǵa baǵyttalǵan Prezıdenttiń aýqymdy reformalaryn joǵary baǵalaǵan.
Sonymen qatar ıgi tilekke toly quttyqtaý jedelhattaryn Rım Papasy Fransısk, Ulybrıtanııa Hanshaıymy II Elızaveta, Japonııa Imperatory Narýhıto, Belgııa Koroli Fılıpp, Nıderland Koroli Vıllem-Aleksandr, Shvesııa Koroli Karl XVI Gýstav, Serbııa Prezıdenti Aleksandr Výchıch, Grekııa Prezıdenti Katerına Sakellaropýlý, Lıtva Prezıdenti Gıtanas Naýseda, Bolgarııa Prezıdenti Rýmen Radev, Horvatııa Prezıdenti Zoran Mılanovıch, Soltústik Makedonııa Prezıdenti Stevo Pendarovskı, Efıopııa Prezıdenti Sahle-Vork Zevde, Túrki memleketteri uıymynyń Bas hatshysy Baǵdat Ámireev, IýNESKO-nyń Bas dırektory Odre Azýle jáne basqalar joldaǵan.
Quttyqtaý jedelhattary áli de kelip jatyr.