О́skemen óndiristik qala. Zaýyt kóp. Zaýyt kóp bolǵan soń da qalany birde tuman, birde tútin basady. Ondaı kúnderi turǵyndardy jótel qysyp, tamaqtaryn ustaıdy. Búgin de qalanyń irgesindegi Tıtan magnıı kombınatynan shyqqan qyzǵylt tútin turǵyndardy alańdatyp qoıdy, dep jazady Egemen.kz.
TMK mańynan býdaqtaı shyqqan qyzǵylt tútinniń beınejazbasy áleýmettik jelilerde tarady. Jeli qoldanýshylary «TMK sehynda jarylys boldy, terezeni ashpańyzdar, dalaǵa betperdemen shyǵyńyzdar» degendeı janashyrlyq jazbalardy qosymsha taratty.
О́skemende qolaısyz meteojaǵdaı jıi oryn alyp turady. Ondaıda Tótenshe jaǵdaılar departamenti mamandary turǵyndarǵa habarlama jiberip, eskerte-tuǵyn. Bul joly eskertýi bylaı tursyn, quzyrly organdardan BAQ ókilderi resmı jaýap ala almaı uzaq kútti. Halyqtyń pikiri san-saqqa júgirdi. Táýelsiz ekolog Dáýlet Asanovtyń aıtýynsha, apat bolǵan kórinedi.
«Beınejazbadaǵy qyzǵylt tútinge qarasam, kásiporynda apat bolǵanǵa uqsaıdy. Al aýǵa taralyp jatqan hlor ma dep boljadym. Biraq, resmı málemetti ekologııa departamentinen alý kerek», dep óz boljamyn aıtty Dáýlet Asanuly.
Sóz sońynda ekologııa О́skemendegi ótkir másele ekenin jáne qosty. Iá, óte ózekti problema. О́tken aıda elimizdiń bas onkology Dılıara Qaıdarovamen sóıleskenimizde, óndiris oshaqtary kóp jerde qaterli isik aýrýy jıi kezdesetinin aıtqan. Shyǵysta sońǵy on aıda ǵana 3274 adamnan qaterli isik anyqtalǵan eken. Sonyń bári aınalyp kelgende ekologııanyń áserinen emes pe?!
Qyzǵylt tútinniń qaıdan shyǵyp jatqandyǵyn surap, oblystyq Ekologııa departamentine de habarlastyq. Departament basshysynyń orynbasary Raýan Turarov ázirge dóp basyp qandaı da aqparat bere almaıtyndaryn jetkizdi. Tıtan magnıı kombınatynyń baspasóz qyzmeti bolsa, resmı jaýap ázirlep jatyrmyz dep qaıyrdy.
Ekologııa, geologııa jáne tabıǵı resýrstar mınıstrligi aımaqtaǵy aýa quramynan alynǵan synama qorytyndysy boıynsha hlordyń mólsheri bekitilgen norma sheginen asqanyn aıtýda. Sondaı-aq kelgen aryz boıynsha jospardan tys tekserý bastalǵan.