Elordalyq «Prıgorodnyı» turǵyn alabynda ardagerlerge arnalǵan ortalyqpen biriktirilgen InterPro jańa aýla klýby ashyldy, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Aýla klýbynyń ashylýyna Esil aýdanynyń ákimi Berik Jákenov, Nur-Sultan qalasynyń Jastar saıasaty máseleleri basqarmasynyń basshysy Qaırat Qambarov, qalalyq máslıhattyń depýtaty Ǵabıt Tájimuratov qatysty.
«Aýla klýbtary óskeleń urpaq úshin tartymdy ortalyq bolyp tabylady. Munda balalardyń aǵylshyn tili, horeografııa, shahmat kýrstary jumys isteıdi. Balalar búgingi tańda bizdiń klýbtarda jumys isteı otyryp, jetistikke jetip, óz qabiletterin ashady. Aýla klýbynyń ashylýyna bastamashy bolǵan Turar Jubanyshqyzyna jeke alǵysymdy bildirgim keledi. Osy múmkindikti paıdalana otyryp, sizderge zor densaýlyq, otbasylaryńyzǵa amandyq jáne kásibı ósý tileımin!», dedi Berik Jákenov.
Al Qaırat Qambarov aýla klýbtarynyń ereksheligi men qoǵam ishindegi mańyzyn atap ótti.
«Búgin Qazaqstan Táýelsizdiginiń 30 jyldyǵy qarsańynda taǵy bir aýla klýbyn ashyp otyrmyz. Aýla klýbtarynyń ereksheligi - olar balalar men jastarǵa ǵana emes, qart adamdarǵa da arnalǵan. Biz halqymyzdyń barlyq toptaryna nazar aýdarýymyz kerek. Osylaısha biz jastardy aǵa býynmen biriktiremiz», dedi Qaırat Qambarov.
Aspan dene shynyqtyrý-saýyqtyrý kesheniniń birinshi qabatynda balalarǵa aǵylshyn tilin, horeografııany, shahmatty tegin úıretedi. Aǵa býyn úshin tegin Sıgýn sabaqtary bar.
Aıta ketsek, búgingi tańda Esil aýdanynda 4 aýla klýby men ardagerlerge arnalǵan 20 ortalyq jumys isteıdi.