Kúni keshe ǵana álemdik jáne qurlyqtyq trıatlon federasııalary 2022 jyldyń 23–24 maýsym aralyǵynda Nur-Sultanda U23 pen Junior sanattaryndaǵy sportshylar arasynda Azııa chempıonaty ótetinin rastady.
Bul aqparatty Qazaqstan Respýblıkasy Ulttyq Olımpıada komıtetiniń resmı saıty taratyp otyr. Osylaısha, el astanasynda alǵash ret 2022 Asia Triathlon Junior and U23 Championships Nur-Sultan atty qurlyqtyq birinshiliktiń jalaýy jelbiregeli otyr. Negizi bul báseke 2021 jyly uıymdastyrylýǵa tıis edi. Alaıda álemdegi turaqsyz epıdemııalyq jaǵdaıǵa jáne birqatar elderdegi shekteýlerge baılanysty atalǵan jarys belgilengen merzimde ótken joq.
Eske sala keteıik, 24 shildege TEMIRADAM Kýbogynyń V kezeńi josparlanyp otyr. Pro jáne Age Group sanatyndaǵy saıyskerler qurlyqtyq chempıonattyń tarıhı dıstansııasynda synǵa túsý múmkindigine ıe boldy.