Memleket basshysy Qasym-Jomart Toqaev Qostanaıdaǵy saıajaılardyń birinde órtke oranǵan úıdiń ishinde qalǵan tórt balany qutqarǵan 5-synyp oqýshysy Oleg Pırogqa erlik pen qaısarlyǵy úshin Alǵyshat joldady. Oleg Qostanaıdaǵy №22 orta mektepte oqıdy.
Prezıdenttiń Alǵyshatynda: «О́zińniń jastyǵyńa qaramastan, sen naǵyz úlken erlik jasadyń! Ajal aranynda qalǵan ózińdeı órimdeı jas balalarǵa der kezinde oılanbastan kómekke umtylyp, batyldyq pen shynaıy qaharmandyqtyń úlgisin kórsettiń! Úlken qaıǵy-qasiretke jol bermediń», dep jazdy.
Qasym-Jomart Kemeluly Toqaevtyń Alǵyshatyn batyr balaǵa oblys ákimi Arhımed Muhambetov tabys etti. Sondaı-aq Oleg Pırog Qazaqstan Respýblıkasy Tótenshe jaǵdaı mınıstrliginiń «О́rtte kórsetken qaısarlyǵy úshin» medalimen, al Olegtiń anasy Valentına Pırog osy mınıstrliktiń Alǵyshatymen marapattaldy.
Memleket basshysynyń úndeýin Allur kompanııalar toby da qoldap, jas qaharmanǵa Qostanaıdaǵy «SaryarqaAvtoprom» seriktestiginde jasalǵan Chevrolet Nexia avtomobılin mingizdi.
– Bizdiń Prezıdentimiz qazaqstandyqtardyń osyndaı erlik isterin árdaıym kóre biledi jáne baǵalaıdy. Qazaq jeri qashanda batyr uldarymen dańqqa bólengen. Jap-jas balanyń ózi bilip jasaǵan ónegeli isi – úlken-kishige birdeı úlgi, tańǵalýǵa turarlyq naǵyz erlik ekeni sózsiz, – dedi «Allur» KT» AQ dırektorlar keńesiniń tóraǵasy Andreı Lavrentev.
Andreı Lavrentev bul syılyq Oleg Pırogtyń erlik áreketin joǵary baǵalaǵan kásiporynnyń barlyq qyzmetkerleriniń atynan ekenin atap ótti.
Aımaq basshysy Arhımed Muhambetov erlikti dáriptep, batyr balaǵa kólik syılaǵan kásiporyn basshylyǵy men Oleg Pırogtyń ata-anasyna alǵys aıtty.
Budan buryn oblys ákimi órt saldarynan baspanasyz qalǵan О́mirzaqovtar otbasyna Qostanaı qalasyndaǵy 3 bólmeli páterdiń kiltin tabys etken bolatyn.
Qostanaı oblysy