Nur-Sultannyń «Barysy» Qurlyqtyq hokkeı lıgasyndaǵy (QHL) kezekti týr oıynyn óz muz aıdynynda Ekaterınbýrgtiń «Avtomobılısine» qarsy ótkizdi.
Qos komandanyń jankúıerleri bul básekeni taǵatsyzdana kútti. Sebebi «Barys» pen «Avtomobılıst» jarys kestesinde qatar tur. Pleı-off dodasyna joldama alý úshin qazirgi kezde ekeýine de jeńis aýadaı qajet. Sony qaperine myqtap túıgen oıynshylar muz aıdynynda aıanbaı aıqasty. Birinshi kezeńde tablodaǵy esep úsh márte ózgerdi. 4-mınýtta Nıkıta Mıhaılıs elordalyq klýbty alǵa shyǵarsa, 8-mınýtta Stefan Da Kosta tarazy basyn teńestirdi. 16-mınýtta Kertıs Volk jergilikti kórermenderdi taǵy bir qýantty. 39-mınýtta ekaterınbýrgtik komandanyń shabýylshysy Anatolıı Golyshev mergendik tanytty. Odan keıin osy esep negizgi ýaqyt pen overtaımnyń aıaǵyna deıin saqtaldy. Býllıt soǵý barysynda «Barystyń» baǵy jandy. Esep – 3:2. Bul joly jeńis shaıbasyn qaqpaǵa engizgen Lınden Veı.
Osy jeńisten keıin «Barys» jarys kestesinde 17-oryndy saqtap qaldy. Olardyń qorjynynda 42 upaı bar. Jerlesterimiz búgin Nur-Sultanda Ýfanyń «Salavat Iýlaevyn» qabyldaıdy.