Májilis Tóraǵasy Nurlan Nyǵmatýlın bıylǵy jalpy otyrysta Palata depýtattarynyń 2021 jylǵy jumysynyń qorytyndylaryn shyǵardy, dep habarlaıdy Egemen.kz.
Májilis Spıkeri atap ótkendeı, osy sessııa bastalǵannan beri Májilis jumysynda 80 zań jobasy boldy, onyń 39-y maquldanyp, Senatqa jiberildi, 25 zańǵa el Prezıdenti qol qoıdy.
«Elbasy Nursultan Ábishuly Nazarbaevtyń strategııasyn jáne el Prezıdenti Qasym-Jomart Kemeluly Toqaevtyń aýqymdy reformalaryn zańnamalyq qoldaý úshin Májilis depýtattary osy sessııanyń basynan bastap birqatar jańa zań jobalaryn ázirledi. Olar, eń aldymen, ekonomıkany qalpyna keltirýge, eldiń ónerkásiptik áleýetin nyǵaıtýǵa, bıologııalyq qaýipsizdikti qamtamasyz etýge, azamattyq qoǵamdy damytýǵa jáne, árıne, qazaqstandyqtardyń ál-aýqatyn arttyrýǵa baǵyttalǵan. Osy máselelerdiń barlyǵy ózekti kún tártibin qalyptastyrady jáne elimizdiń odan ári áleýmettik-ekonomıkalyq damýyna yqpal etetin bolady», dedi Nurlan Nyǵmatýlın.
Osy sessııada Májilis depýtattary maquldaǵan zań jobalarynyń ishinde - adam quqyqtary jónindegi ýákil týraly, sot júıesi men sýdıalardyń mártebesi týraly, Quqyq qorǵaý organdary, prokýratýra men sot arasyndaǵy ókilettikterdiń arajigin ajyratatyn úsh býyndy modeldi engizý máseleleri boıynsha zań jobalary bar.
Memlekettiń ekonomıkalyq saıasatyn zańnamalyq qamtamasyz etý odan ári jetildirildi. Maquldanǵan zań jobalarynyń qatarynda ónerkásiptik saıasat týraly, básekelestikti damytý máseleleri boıynsha, memlekettik satyp alýǵa, jer qoınaýyn paıdalanýshylar men tabıǵı monopolııalar sýbektileriniń satyp alýyna qatysty zań jobalary bar.
Sonymen qatar, Májilis depýtattary Táýelsizdiktiń 30 jyldyǵyna baılanysty raqymshylyq jasaýdy, memlekettik basqarý deńgeıleri arasynda ókilettikterdi qaıta bólýdi, kásipkerlik qyzmet salasynda jańa retteý saıasatyn engizýdi, bırjalyq saýdany damytý men jasaýdy kózdeıtin zań jobalaryn maquldady.
«Jalpy, Májilistiń depýtattyq korpýsynyń jumysy sessııanyń alǵashqy kúnderinen bastap aıtarlyqtaı qarqyndy jáne mazmundy boldy», dep atap ótti Májilis Spıkeri.
Ol osy sessııanyń basynan bastap 5 Úkimet saǵaty, Májilis komıtetteriniń 4 kóshpeli otyrysy, 1 halyqaralyq konferensııa men 9 «dóńgelek ústel» ótkizilgenin atap ótti.
Parlamentshiler qyzmetiniń halyqaralyq baǵyty týraly aıta kele, Nurlan Nyǵmatýlın qyrkúıekte Túrkistanda ótken Túrkitildes memleketter Parlamenttik Assambleıasynyń (TúrkPA) H plenarlyq otyrysyn eske saldy. Onyń jumysyna Ázerbaıjan, Qazaqstan, Qyrǵyzstan, Túrkııa, sondaı-aq О́zbekstan men Vengrııadan parlamenttik delegasııalar qatysty. Sonymen qatar, Májilis Spıkeri otyrysta alǵash ret Modeldik zańdar qabyldanǵanyn, bul TúrkPA qyzmetiniń zań shyǵarýshylyq baǵytynyń kúsheıýin aıǵaqtaıtynyn atap ótti.
«Kelesi, 2022 jyly bizdi odan da kóp jumys kútip tur. Barlyq fraksııalardyń, barlyq depýtattardyń birlesken jumysynyń arqasynda Parlament Májilisi el basshylyǵynyń saıasatyn sapaly ári tıimdi zańnamalyq qoldaýdy qamtamasyz etetinine senimdimin», dep qorytyndylady Nurlan Nyǵmatýlın.