Polsha astanasy – Varshavada jyldam shahmattan áıelder arasyndaǵy álem chempıonaty óz máresine jetti. Bul jarysta Qazaqstannyń birneshe oıynshysy baq synady.
Otandastarymyzdyń arasynan eń úzdik nátıjege Bıbisara Asaýbaeva qol jetkizdi. 17 jastaǵy asa daryndy qyzymyz nebir myqty oıynshylardy jolynan yǵystyryp, 8,5 upaıdy qorjynǵa saldy. Nátıjesinde, oǵan kúmis medal buıyrdy. Bıbisaradan bar-joǵy jarty upaı ǵana kóp jıǵan 37 jastaǵy reseılik Aleksandra Kostenıýk álem chempıony ataǵyna qol jetkizdi. Jarystyń sońǵy kúni esimderi joǵaryda atalǵan qos shahmatshy da qarsylastarymen teń oınady. Atap aıtsaq, Asaýbaeva óziniń komandalyq áriptesi Ekaterına Lagnomen, al Kostenıýk úndistandyq Hampı Konerýmen upaı bólisti. Reseıdiń taǵy bir oıynshysy Valentına Gýnına (8 upaı) qola medaldy moınyna ildi.
Varshavadaǵy dodada óner kórsetken ózge qyzdarymyzdyń nátıjeleri mynadaı: Ásel Serikbaı (7,5 upaı) – 5-oryn, Jansaıa Ábdimálik (7,5 upaı) – 11-oryn, Merýert Kamalıdınova (6 upaı) – 33-oryn, Nazerke Nurǵalı (6 upaı) – 40-oryn jáne Lııa Qurmanǵalıeva (5 upaı) – 62-oryn.