QR Parlamenti Senatynyń depýtattary palatanyń jalpy otyrysynda QR Joǵarǵy Sotynyń sýdıasy qyzmetine konkýrstan tys tártippen Nurserik Sháripovty saılady. Buǵan deıin ol Qaraǵandy oblystyq sotyn basqarǵan, dep habarlaıdy Egemen.kz.
Nurserik Sháripovtyń kandıdatýrasyn Qazaqstan Respýblıkasy Joǵarǵy Sotynyń sýdıasy qyzmetine konkýrstan tys tártippen saılaý úshin Senattyń qaraýyna prezıdent Qasym-Jomart Toqaev engizdi.
QR Joǵary Sot Keńesiniń tóraǵasy Denıs Shıpp Nurserik Sháripovtiń 25 jyldan astam sýdıalyq jumys tájirıbesi bar ekenin habarlady. Sot qyzmetin Almaty qalasyndaǵy aýdandyq sotynyń sýdıasy bolyp bastady, eki aýdandyq sotty - Almaty Mamandandyrylǵan aýdanaralyq ákimshilik sotyn jáne Mańǵystaý oblysynyń Mamandandyrylǵan aýdanaralyq ekonomıkalyq sotyn basqardy. Odan ári Mańǵystaý oblystyq sotynyń apellıasııalyq sot alqasyn basqaryp, Ońtústik Qazaqstan oblystyq sotynyń tóraǵasy, QR Joǵarǵy Soty apparatynyń basshysy boldy. 2018 jyldyń jeltoqsan aıynan bastap Qaraǵandy oblystyq sotynyń tóraǵasy qyzmetin atqardy.
«Sýdıalyq qoǵamdastyqta bedelge ıe, QR Joǵarǵy soty sýdıasynyń jaýapty jumysyna daıyn», dedi QR Joǵary Sot Keńesiniń tóraǵasy Denıs Shıpp.
Depýtattar bul usynysty qoldady.
«Qazaqstan Respýblıkasy Prezıdentiniń 2021 jylǵy 27 jeltoqsandaǵy usynysy negizinde jáne Qazaqstan Respýblıkasy Konstıtýsııasynyń 55-babynyń 1) tarmaqshasyna, 82-babynyń 1-tarmaǵyna jáne «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasy Konstıtýsııalyq Zańynyń 31-babynyń 1-tarmaǵyna sáıkes Qazaqstan Respýblıkasy Parlamentiniń Senatyna Nurserık Kárimuly Sháripovty Qazaqstan Respýblıkasy Joǵarǵy Sotynyń sýdıasy qyzmetin konkýrstan tys tártippen saılaý usynylsyn», dep oqydy Senator Vladımır Volkov.
О́z kezeginde Nurserik Sháripov óz mindetterin adal atqarýǵa, sot tóreligin QR Konstıtýsııasy men zańdaryna ǵana baǵyna otyryp júzege asyrýǵa ant berdi.