Kontrterrorlyq is-sharalarmen qatar ınternet te shektelgeni málim. Sebebi terrorıstik toptar is-áreketterin josparlap, úılestirý úshin baılanys quraldaryn paıdalanýda. Bul týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın jelidegi paraqshasynda jazdy, dep habarlaıdy Egemen.kz.
«Negizgi salalardy sıfrlandyrý saldarynan kóptegen adamdar qolma-qol aqshasyz qaldy. Sondyqtan biz Ulttyq bankpen, sondaı-aq basqa da bank jáne uıymdarmen birge Internettiń joqtyǵyna qaramastan, keıbir resýrstardy táýlik boıy qoljetimdi etý mehanızmin jasadyq.
Qazirge sátte:
1. Halyq Hoýmbank pen Kaspıdiń tólem servısterin qoldanýǵa bolady. Basqa da bankterdi qosý jumysy atqarylyp jatyr. Iаǵnı ınternet bolmasa da, bul qosymshalar qoljetimdi bolady.
Birqatar aqparattyq resýrstar jumys istep tur: egemen.kz, tengrinews.kz, inform.kz, baq.kz, 24.kz, stopfake.kz, qazaqstan.kz jáne t.b. akorda.kz saıty oflaın tártipte qoljetimdi», dep jazdy mınıstr.Búgin basqa da asa qajetti servısterdi iske qosý máselesi sheshiledi. Jumystar birtindep júzege asýda, ár resýrsty jeke-jeke qarastyryp, aram pıǵyldylardyń paıdalanbaýyn qadaǵalap, qaýipsizdikti qamtamasyz etý qajet.
Prezıdenttiń birneshe tapsyrmasy oryndaldy.Birinshi: ınternet óshirilgendikten, adamdar dybys jáne sms trafıgin paıdalanǵandyqtan, barlyq abonentterge tegin 200 sms pen 300 mınýt berildi.
Ekinshi: zardap shekkender men iz-tússiz joǵalǵandardy izdeý boıynsha 1414 koll-ortalyǵy negizinde tikeleı jeli uıymdastyryldy.
Úshinshi: baılanys operatorlarymen tyǵyz jumys isteýdiń arqasynda azamattarǵa SMS arqyly habarlandyrýlar men jańalyqtar joldanýda.