Qazaqstanda lańkestikke, ekstremızm men zorlyq-zombylyqqa jol joq jáne egemendigimiz ben aýmaqtyq tutastyǵymyzǵa qol suǵýǵa jol berilmeıdi. Bul týraly Ujymdyq qaýipsizdik keńesiniń kezekten tys sessııasynda Memleket basshysy Qasym-Jomart Toqaev málim etti, dep habarlaıdy Egemen.kz.
«Qazaqstan azamattarynyń quqyǵy qorǵalatynyn erekshe aıtyp ótkim keledi. Biz lańkestikke, ekstremızm men zorlyq-zombylyqqa jol bermeımiz. Onyń ústine Qazaqstanda shabýylǵa esh jol joq. Bizdiń egemendigimiz ben aýmaqtyq tutastyǵymyzǵa qol suǵýǵa jol berilmeıdi. Jáne Qazaqstan halyqaralyq mindetterin qatań saqtaıdy. Qurmetti dostar, áriptester, qazirgi ýaqytta Qazaqstanda Konstıtýsııalyq tártip qalpyna keltirilip, qaıta ornady. Elge tóngen qaýiptiń beti qaıtaryldy. Búginde lańkestikke qarsy operasııa aıasynda elge bolǵan jaǵdaıǵa qatysy barlardy anyqtap, tabý jumysy júrip jatyr. Qazirdiń ózinde quzyrly organ 8 myńǵa jýyq adamdy ustady. Quqyq qorǵaý organdary ustalǵandardyń lańkestikke, buzaqylyqqa jáne kisi ólimine qanshalyqty qatysy baryn tekserip jatyr», dedi Qasym-Jomart Toqaev.