Resmı málimetterge súıene otyryp, UǴA Tóralqasy otandastarymyzǵa jáne áriptesterimizge tómendegideı usynystaryn bildiredi.
Sońǵy úsh-tórt kúnde elimizde beleń alǵan oqıǵaǵa qabyrǵamyz qaıysyp otyr. Prezıdent Qasym-Jomart Kemeluly Toqaev Prezıdenttik mindetine kirisken ýaqyt aralyǵynda el damýy úshin durys sheshimder qabyldap keledi. Elimizde oryn alǵan tótenshe jaǵdaı barysynda Prezıdenttiń halyqaralyq arenadaǵy bedeliniń joǵary ekendigin kórip otyrmyz. Bul bizdiń memleketimizdiń turaqtylyǵyna jáne jarqyn bolashaǵyna úlken senim týǵyzady. Bizdi tańǵaldyryp otyrǵan resmı derek - Almaty qalasyna 20 myń lańkestiń bildirmeı kirip ketkendigi. Osynshama lańkesterdiń on myńdaǵan jasty arttaryna ertip, kóshege shyqqany tipti túsiniksiz. Sonda bizdiń shekara qyzmetkerleri men qaýipsizdik komıteti qaıda qarap otyr? Sonshama adamdy ornalastyryp, tamaqtandyryp qana qoımaı, qarýlandyryp jáne eń bastysy olarǵa úlken qarjy taýyp berip uıymdastyrý úlken kúshti qajet etetini belgili. Memleketimizdiń tynyshtyǵyn buzǵysy kelgen lańkester men satqyndyq jasaǵan jaýapty memlekettik qyzmetkerler tıisti jazasyn alýlary kerek. Bul máseleni asyǵyp-aptyqpaı, sabyrlyqpen zerttep, ádiletti sheshim qabyldaýymyz kerek. Qatelesip olarǵa eliktep erip ketken jastardy lańkesterden ajyrata bilý qajet. Árıne el aýzynda júrgen kúrdeli máselelerdi aıtpaı ketýge bolmaıdy. Eń birinshi kezekte bul qoǵamda oryn alǵan jemqorlyq. Ony aýyzdyqtamaı biz alǵa qadam da, aýyzbirshiligi mol qoǵam da qura almaımyz. Bul halyqaralyq tájirıbeden belgili. Alǵa tartatyn kúrdeli jaıttyń biri kadr máselesi. Osyndaı ýaqytta qyzmetterge kadr tańdaýda durys sheshim qabyldaýymyz qajet. Damyǵan elderdiń barlyǵynda basshy qyzmetker jáne onyń orynbasarlary ujymnyń nemese sol aýdandaǵy, óńirlerdegi halyqtyń jasyryn daýys berýi arqyly saılanady. Bizde osy tájirıbelerge súıenýimiz kerek. Sonda ǵana qatelikter bolmaıdy. Bastyq bolyp, aınalasyna tamyr-tanystaryn jınaýdy múldem toqtatý qajet, bul túptiń-túbinde jemqorlyqqa nemese urlyqqa aparyp soqtyrýy múmkin. Osy oraıda UǴA ujymy atynan Prezıdent Q.Toqaevqa aıtar ótinishimizde joq emes. Eń bastysy 2003 jyldan bastap elimizdiń jetekshi ǵalymdarynan quralǵan 75 jyldyq tarıhy bar Ulttyq ǵylym akademııasy jol shetine yǵystyryldy. Bizdiń aıtatyn usynystarymyz bıliktiń qulaǵyna jete bermeıdi. Bul ǵalymdardy daıyndaý úshin qansha eńbek, tipti memlekettiń qanshama qarajaty jumsaldy. Olardy el damýyndaǵy sharýalarǵa qosyp jumys istetken paıdaly emes pe. UǴA-nyń bul aıanyshty jaǵdaıy basqa memleketterde joq. Tipti keshe ǵana kósh sońynda kele jatqan Afrıkanyń keıbir memleketterinde de Ulttyq ǵylym akademııalary qurylyp, el ıgiligine jaqsy jumys istep keledi. Ǵalymdar tarıhynan belgili bir jaıtty aıta ketkimiz keledi. Fransııanyń belgili ǵalymy Lavýazeni patsha buıyrǵan ólim jazasynan eshkim qutqara almady. Gılotınaǵa tartyp óltirý bar-joǵy bes-aq mınýt ýaqytty aldy. Biraq Fransııaǵa Lavýaze sııaqty ǵalymdy daıyndaý úshin 50 jyl qajet boldy. Osy mysaldan sabaq ala otyryp, ǵylymnyń mártebesin kóterip, ǵylym men bilimniń áleýetin elimizdiń damýyna paıdalaný kerek. QR Prezıdenti Q.Toqaev saılanǵan ýaqyttan bastap el estıtin Úkimet qurýdy aıtyp kele jatyr. Bul óte durys qadam. Sebebi túsinbeýshilikten týǵan narazylyqty joıýdyń eń basty quraly bolyp tabylady.Sóz sońynda aıtarymyz, súıikti otanymyz Qazaqstan bilimi de, ǵylymy da damyǵan el. Oǵan qosa taǵdyrdyń bizge bergen keń-baıtaq jeri men sheksiz jer asty baılyǵy bar. Olardy ózimiz óndirip, ǵalymdar jasaǵan jańa tehnologııamen taýar shyǵarsaq, halqymyzdyń áleýmeti jetilgen baı memleket bolarymyz aıdan anyq. Egemendi elimiz úshin qıyn-qystaý sátterde aýyzbirshiligimiz synalýda. Biz úshin eń basty qundylyǵymyz - bul Táýelsizdik. Sondyqtan Memleket basshysy Q.Toqaev júzege asyryp jatqan reformalar men saıasatqa tolyqtaı qoldaý bildiremiz.
M.Jurynov
UǴA Tóralqasy