Qazaqstandyq dıdjeı Imanbek – TMD boıynsha tregi 1 mlrd-tan asa tyńdalǵan tuńǵysh mýzykant. Ol bul mejege ótken jyldyń qazan aıynda jetken. Onyń Roses-Imanbek Remix atty áýenin tyńdaǵandar sany búginde álem boıynsha 1,5 mıllıardtan asyp ketti. Soǵan oraı Imanbek Spotify servısiniń arnaıy syılyǵyna ıe boldy.
Mýzyka servısi dıdjeıdi quttyqtap, syılyqty tabystady. «Ártisti osyndaı iri jetistikpen jáne klýbqa qosylýymen quttyqtaımyz. It is for Imanbek!», delingen habarlamada. Osylaısha, Imanbek Billions Club-qa qosyldy. Ol pleılıst boıynsha Bıllı Aılısh, Trevıs Skott, Adel jáne basqa álemdik ataqty mýzykanttarmen qatar tur.
Buǵan deıin Spotify-dyń dál osy marapaty kanadalyq reper Dreık, norveg dıdjeıi Kygo jáne brıtan ánshisi Dýa Lıpaǵa buıyrǵan edi.
Aıta keteıik, atalǵan remıksimen álemdik mýzyka charttarynda qara úzip alǵa shyqqan Imanbek Zeıkenov án árleýdi jergilikti dıdjeıler men prodıýserlerden, Youtube jelisindegi beınesabaqtardan úırengen. 2019 jyldyń jazynda Imanbek Saint Jhn atty reperdiń úsh jyl buryn shyqqan Roses atty ánine remıks jazǵan. Odan soń birneshe aı ótkende ol pop juldyzǵa aınaldy. О́tken jyly qazaqstandyq mýzykanttyń Roses ánine jazylǵan remıksi Grammy syılyǵyn jeńip aldy.