Halyqaralyq fýtbol federasııasy (FIFA) 2021 jyldyń qorytyndysy boıynsha Robert Levandovskııdi álemniń eń úzdik fýtbolshysy dep tanydy.
33 jastaǵy Polsha quramasy men Mıýnhenniń «Bavarııa» klýby shabýylshysynyń byltyr jasyl alańda jasyndaı jarqyldaǵany belgili. Ol býndeslıgada – 43, Chempıondar lıgasynda – 11, ulttyq komanda sapynda – 11 jáne klýbtyq álem chempıonaty men Germanııa sýperkýbogynda eki retten nysanany dál kózdedi. Barlyǵy 69 gol soqty. Oǵan ár kezdesýlerdegi jankeshti oıyny men ádemi pastaryn qosyńyz. Sóıtip Levandovskıı eń úzdik fýtbolshyǵa tıesili arnaıy syılyqty ıelendi. Ekinshi oryndy «Lıverpýldiń» surmergeni Muhamed Salah ıelense, úshinshi oryndy PSJ-nyń juldyzy Lıonel Messı enshiledi. Sondaı-aq Karım Benzema («Real»), N’Golo Kante («Chelsı»), Jorjıno («Chelsı»), Krıshtıaný Ronaldý («Manchester Iýnaıted»), Kılıan Mbappe (PSJ), Kevın de Breıne («Manchester Sıtı») jáne Neımar (PSJ) úzdik ondyqtyń qatarynan kórindi.
Al eń úzdik bapker atalymy boıynsha Tomas Týhel top jardy. 48 jastaǵy nemis mamany Anglııanyń «Chelsı» klýbymen birge Chempıondar lıgasyn utyp, ÝEFA sýperkýbogyn ıelendi.