Qazaqtyń kásipqoı boksshysy Aıdos Erbosynuly byltyrǵy jyldyń qyrkúıek aıynda gaıanalyq Allen Lennoksty uryp jyqqan soń reseılik Evgenıı Shvedenkomen kúsh synasýǵa tıis edi.
Atalǵan jekpe-jekte jeńiske jetken boksshy IVǴ nusqasy boıynsha ekinshi orta salmaqtyń chempıondyq belbeýi úshin talasýǵa múmkindik alatyn edi. Alaıda qandasymyz koronavırýs juqtyryp alyp, ol kezdesý ótpeı qaldy. Qazir Erbosynulynyń komandasy kýbalyq Devıd Morrelmen kelissóz júrgizýde. 81 kılo salmaqta óner kórsetken Bostandyq aralynyń ókili 2016 jyly jastar arasynda álem chempıony atanyp, eresekterdiń el birinshiliginde kúmis medaldy moınyna ildi. Esesine kelesi jyly Kýba chempıonatynda qarsylas shaq keltirmeı, bas júldeni oljalady. 2019 jyldan beri kásipqoılar arasynda judyryqtasyp júr. Sol aralyqta alty kezdesý ótkizip, barlyǵynda jeńiske jetti. 23 jastaǵy kýbalyq qabylan qazirgi kezde WBO nusqasynyń altyn belbeý ıegeri.
30 jastaǵy Aıdos Erbosynuly kásipqoılar arasynda kúsh synasyp júrgenine alty jyldan asty. Sol aralyqta 16 ret rıngke shyqqan qazaq boksshysy barlyq básekeni óz paıdasyna sheship, 11 qarsylasyn esinen tandyrdy.