Revaksınasııa alǵashqy jasalǵan ekpeden keıingi ımmýnıtetti qoldaýǵa arnalady. Revaksınasııaǵa qalaı daıyndalý kerek jáne ony kimge alýǵa bolmaıdy? Bul suraqtarǵa elordadaǵy №15 qalalyq emhananyń SО́S dárigeri Gıýzel Eginbaı jaýap berdi, dep habarlaıdy Egemen.kz elorda ákimdiginiń resmı saıtyna silteme jasap.
Revaksınasııa – bul vaksınany nemese onyń komponentteriniń birin qaıta engizý. Bul shara aldyńǵy vaksınalardan keıingi ımmýnıtetti qoldaýǵa baǵyttalǵan. Jalpy, revaksınasııa ımmýnıtettiń vırýspen kúresýi úshin jasalady. Ýaqyt óte kele aǵzanyń koronavırýs ınfeksııasynan qorǵalý dárejesi tómendeıdi, osyǵan baılanysty vaksınany qaıta alý qajet.
«Sarapshylardyń kóbisi «kross-vaksınasııany», ıaǵnı vaksınanyń basqa túrin qabyldaýdy jón sanaıdy. Qazaqstanda revaksınasııa shartty túrde eki kezeń boıynsha ótetini belgili. Birinshi kezekte qaýip tobyndaǵy adamdar egiledi. Aldymen medısına qyzmetkerleri, pedagogtar, kúsh qurylymdary men jabyq balalar mekemeleriniń qyzmetkerleri revaksınasııadan ótedi. Meniń oıymsha, bul durys sheshim, óıtkeni olar adam kóp shoǵyrlanǵan úlken ujymdarda jumys isteıdi», dedi dáriger.
Sondaı-aq, revaksınasııa negizinen sozylmaly ınfeksııamen aýyrǵan nemese ótkir ınfeksııa juqtyrǵan adamdar úshin qajet. Mundaı adamdarda ımmýnıtettiń álsireýi jıi kezdesedi jáne koronavırýsqa qarsy ımmýndyq kúshti saqtaý úshin pasıentterge revaksınasııa qajet. Aıta ketý kerek, revaksınasııa ınfeksııany qaıta juqtyrý qaýpin kúrt tómendetedi. Revaksınasııa tártibi ekpeni alǵash alǵan kezdegideı júrgiziledi: pasıent terapevtke baryp, revaksınasııa jasaýǵa ruqsat alady. Osyǵan deıin koronavırýs juqtyrǵan, sol sııaqty adam aǵzasyndaǵy antıdeneler sany ekpeni qaıta alýyna kedergi bolmaıdy.
Revaksınasııadan kimder óte almaıdy?
Ol da ekpeni alǵash alǵan kezdegideı: sozylmaly aýrýlardyń órshýi, jiti jedel aýrýlardyń bolýy jáne vaksınaǵa allergııalyq reaksııalardyń bolýy.
Revaksınasııaǵa qaı ýaqytta ruqsat etilmeıdi?
Revaksınasııany keıinge qaldyrýǵa bolady, eger:
- sozylmaly aýrýlardyń órshýi bolsa;
- vaksınasııadan eki apta buryn jáne vaksınasııa kezinde JRVI belgileri bolsa;
- sońǵy 14 kúnde basqa ekpeler jasalǵan bolsa. Mundaı jaǵdaılarda ımmýnıtet álsireıdi. Sondyqtan jaǵdaıdyń durystalǵanyn kútý nemese basqa vaksınasııadan keıin bir aı ýaqyt ótkenin kútý kerek, osydan keıin koronavırýsqa qarsy qaıta vaksınasııalaný kerek.
Revaksınasııaǵa qalaı daıyndalý kerek?
Qaıta vaksınasııalanǵysy keletinder birneshe tarmaqty eskerýi kerek:
- Revaksınasııadan ótkenge deıin úsh kún ishinde alkogol ishpeý kerek.
- Vaksınasııa aldynda fızıkalyq, emosııalyq kúsh túsetin jumys isteýge bolmaıdy. Sol sııaqty ekpe alǵannan keıin de 3 kún ishinde fızıkalyq kúsh túsetin jumys istemeý kerek.
- 37°C jáne odan joǵary dene qyzýy kezinde ekpe alýǵa bolmaıdy.
- Vaksınasııadan buryn tamaqtaný kerek, biraq tamaq maıly bolmaýy kerek. Sondaı-aq basqa bir elge saıahattar bolsańyz, ol elge kirý erejelerin aldyn ala bilý kerek, sebebi ózgerister jıi engizilip otyrady.