Nur-Sultan qalasynyń ákimi Altaı Kólginov Baıqońyr aýdanynyń damý barysy týraly aıtty, dep habarlaıdy Egemen.kz qala ákimdiginiń resmı saıtyna silteme jasap.
«Jumys barysynda aýdandarymyz ben eldi mekenderimizdi turaqty túrde aralaımyz. О́ndiris, Kırpıchnyı jáne Qazqalashyq (Baıqońyr aýdany) eldi mekenderiniń turǵyndarymen kezdestim. Problemalardy qysqa merzimdi, orta merzimdi jáne uzaq merzimdi dep bólemiz. Alǵashqy ekeýi boıynsha negizgi saýaldar – jaryqtandyrý, joldar, aýlalar men qoǵamdyq keńistikter salý, avtobýs marshrýttaryn iske qosý jáne t.b. Bul problemalardy turaqty túrde sheship kelemiz.
Uzaq merzimdi problemalarǵa tolyǵyraq toqtalyp óteıin. Buǵan deıin qala turǵyndary mektep, balabaqsha, sport nysandaryn salý, sondaı-aq sýmen jabdyqtaý jáne t.b. máseleler boıynsha ótinish bildirgen bolatyn», dedi qala ákimi.
Osylaısha, 2021 jyldyń qyrkúıeginde О́ndiris eldi mekeninde bes qabatty mektep ashyldy. Ol Memleket basshysynyń tapsyrmasy boıynsha qazirgi №23 orta mektep aýmaǵyna salyndy. Eski mektepte ashana, akt zaly, muǵalimder, ádistemelik kabıneti bolmaǵan edi. Atalǵan problemalardyń bári, sol sııaqty tyǵyzdalǵan rejım máselesi de sheshildi.
«Bıyl Kırpıchnyı eldi mekeninde taǵy bir mektep salamyz. Sondaı-aq, jeke ınvestor esebinen balabaqsha qurylysy da bastalady. Balabaqshany sýbsıdııalaıtyn bolamyz, osylaısha ata-analarǵa aýyrtpalyq túspeıdi. О́ndiris eldi mekeninde dene shynyqtyrý-saýyqtyrý kesheni salyndy, onda qala turǵyndary sportpen tegin aınalysyp, túrli úıirmelerge qatysa alady jáne t.b.
Sýmen jabdyqtaý máselelerine toqtalyp óteıin. Byltyr sorǵy-súzgi stansııasynyń (SSS) qurylysy bastalǵan bolatyn. SSS-3 jumysynyń birinshi kezeńi bıyl kúzde bastalady. Al 2023 jyly tolyq aıaqtalady. Sorǵy-súzý stansııasy qalanyń aldaǵy ýaqytta qurylys jumysy júretin aýdandaryn aýyz sýmen qamtamasyz etýge, sondaı-aq sýmen jabdyqtaýdyń qazirgi qýatyn arttyrýǵa múmkindik beredi. Jańa jobanyń qýattylyǵy – táýligine 105 myń tekshe metr. Bul – qalanyń tynys-tirshiligin qamtamasyz etý úshin óte mańyzdy strategııalyq nysan», dedi elorda ákimi.
Gaz taratý jelisin Almaty jáne Saryarqa aýdandarynda 9 eldi mekende ornalasqan. Al Baıqońyr aýdanyn gazdandyrý jumysy 2022 jáne 2023 jyldarǵa bólingen. Mysaly, bıyl О́ndiris, al 2023 jyly Kırpıchnyı, Qazqalashyq eldi mekenderinde gaz taratý jelileriniń qurylysy bastalady.
«Eldi mekenderde eki jyl ishinde 160-tan astam kóshege asfalt tósedik, aýlalar men qoǵamdyq keńistikterdi abattandyrdyq, jaryqtandyrý jumysyn júrgizdik, jańa avtobýs marshrýttaryn iske qostyq, «úıdegi dáriger» jáne t.b. birqatar nysandar ashtyq.
Osylaı aýdandarymyz ben eldi mekenderimizdiń turǵyndarymen kózbe-kóz kezdesemiz. Qala turǵyndary arqyly túsetin suraqtardy aralaý, azamattardy qabyldaý jáne basqa da kezdesýler arqyly baqylaýymyzǵa alamyz», dep jazdy qala ákimi.