BUU Balalar qorynyń (IýNISEF) Qazaqstandaǵy keńsesi Astana Hub IT startaptar halyqaralyq tehnoparkimen birlesip, elimizdiń 11 oblysynda 12 myńnan astam muǵalimdi aralas formatta sıfrly ınklıýzıvti bilim negizderin oqytýdy josparlap otyr. Oqytý Bilim jáne ǵylym mınıstrliginiń oblystyq basqarmalarymen jáne bilim departamentterimen birlesip júzege asady. Trenıngke qalalyq jáne aýyldyq mektepterdiń muǵalimderi qatysady. Búgingi tańda kýrsqa on myńnan astam tyńdaýshy tirkeldi.
«COVID-19 pandemııasy eń osal balalarǵa – erekshe bilim berý qajettilikteri bar balalarǵa bilimge qoljetimdilikti shekteý jáne qashyqtan oqytýǵa kóshýden eń kóp zardap shegetinin anyq kórsetti. Bizdiń maqsatymyz – olardyń qajettilikterine qaramastan ár balaǵa birdeı qoljetimdi bilim berý prosesin qoldaý. Sıfrly tehnologııa qoldanysymen júzege asatyn aralas format oqý úderisin ıkemdi jáne bilim berý ortasyn beıimdelgish etedi. Biraq munda muǵalimderdiń biliktiligi men bilimi basty ról atqarady. Sondyqtan Astana Hub-pen birlese otyryp, kóptegen muǵalimdi jańa sandyq quraldarǵa úırete alatynymyzǵa qýanyshtymyn», dedi IýNISEF-tiń Qazaqstandaǵy ókili Artýr van Dızen.
Aralas format – arnaıy aqparattyq tehnologııalardy paıdalana otyryp, synypta oqytýdyń dástúrli formalaryn biriktirýdi kózdeıtin zamanaýı bilim berý tásili. Qazaqstandyq muǵalimderge arnalǵan aralas formattaǵy sıfrly ınklıýzıvti bilim berý kýrsy Okoo.kz bilim berý platformasynda ótýde. Kýrs tyńdaýshylardyń birinshi toby «ınklıýzııa» termınin, qalyptasqan qaǵıdalar men qate túsinikterdi zertteı bastady. Oǵan qosa olar erekshe bilim berý qajettilikteri bar balalardy oqýǵa tartýdyń jańa tehnologııalarymen tanysady.
Olar mektepte qolaıly jaǵdaı jasaý úshin ártúrli sıfrly quraldy paıdalana otyryp, qashyqtan jáne ınteraktıvti sabaqtardy uıymdastyrý ádisterin zertteıdi.
«Sıfrly tehnologııalar sıfrly bilim berýdi qoljetimdi jáne ınklıýzıvti etý sııaqty jahandyq máselelerge áser ete alatyny qýantady. Bolashaqta IT-tehnologııalar erekshe bilim berý qajettilikteri bar balalardyń oqý baǵdarlamasyna qatysýyna kedergi keltiretin barlyq kedergini tolyǵymen jeńýge kómektesedi dep senemiz», dedi Astana Hub IT-startap tehnoparkiniń bas dırektory Maǵjan Mádıev.
Kýrs aıasynda muǵalimder Mural, Padlet, ZOOM, Canva, Kahoot jáne t.b. quraldardy paıdalanýdy úırenedi.
Bilim jáne ǵylym mınıstrliginiń málimetterine sáıkes 2020 jyldyń 1 qańtaryndaǵy jaǵdaı boıynsha Qazaqstanda 161 826 erekshe bilim berýdi qajet etetin bala turady, olar úshin 99 arnaıy mektep quryldy, onda 15 myń bala oqıdy. Sondaı-aq 42 mektepke deıingi arnaıy uıym bar. Qalǵan balalar ınklıýzıvti ortada jalpy bilim beretin mektepterde oqytylady.