Memleket basshysy Qasym-Jomart Toqaev «Ortalyq Azııa - Úndistan» sammıti barysynda el basshylaryna óńiraralyq kólik-logıstıkalyq konsorsıým qurý múmkindigin qarastyrýdy usyndy, dep habarlaıdy Egemen.kz.
«Álemdik sharýashylyq baılanystar júıesinde Ortalyq Azııanyń kóliktik-logıstıkalyq áleýeti zor. Qazaqstan aýmaǵy arqyly 11 halyqaralyq tranzıttik dáliz ótedi. Onyń ishinde 5 temirjol jáne 6 avtomobıl baǵyty shyǵys-batys jáne soltústik-ońtústik baǵytynda júk qozǵalysynyń joǵary jyldamdyǵyn qamtamasyz etedi. Soltústik-batys baǵytta Eýrazııalyq ekonomıkalyq odaq keńistigindegi biryńǵaı kedendik aýmaqty eskere otyryp, Reseı naryǵyna, sondaı-aq Shyǵys Eýropanyń birqatar elderine kedergisiz qoljetimdilik bar», dedi Qasym-Jomart Toqaev sammıt barysynda.
Memleket basshysy qýaty jylyna 26 mln tonna bolatyn Aqtaý jáne Quryq qazaqstandyq porttary arqyly ótetin ońtústik-batys marshrýtynyń da bolashaǵy zor ekenin atap ótti.
«Kaspıı teńizi arqyly olar Kaspıı óńiri, Túrkııa memleketterine jáne odan ári Batysqa keń jol ashady. Sońǵy on jylda Qazaqstan ulttyq kólik ınfraqurylymyn damytýǵa shamamen 30 mlrd dollar ınvestısııalady. Bolashaqta biz ony jańǵyrtýǵa eleýli ınvestısııalar salýdy jalǵastyramyz. Teńizge shyǵa almaıtyn elderimiz úshin bul strategııalyq mańyzy bar másele. Ortalyq jáne Ońtústik Azııanyń ózara baılanystylyǵy arhıtektýrasynyń negizgi elementi senimdi, tıimdi jáne qaýipsiz tranzıttik ınfraqurylym qurý bolýǵa tıis dep senemin», dep qosty Prezıdent.
Osyǵan baılanysty Memleket basshysy óńiraralyq kólik-logıstıkalyq konsorsıým qurýdy usyndy.
«Ol úshin óńiraralyq kólik-logıstıkalyq konsorsıým qurý múmkindigin qarastyrýdy usynamyn. Atalǵan qurylym Úndistan, Kaspıı teńizi men Parsy shyǵanaǵy porttary baǵytyndaǵy kólik baǵyttarynyń tolyqqandy ári ózara tıimdi júktelýine qatysty ulttyq saıasatty tıimdi úılestirýdi qamtamasyz ete alar edi», dep atap ótti Qasym-Jomart Toqaev.