«Eliń tynysh bolsa, óziń de tynysh bolarsyń» degen ataly sózdiń aqıqatyna «Qasiretti qańtar» oqıǵasy anyq kóz jetkizdi. Eldiń birligi men tynyshtyǵy qymbat. Endigi arada ótken oqıǵadan qorytyndy shyǵaryp, Prezıdentimiz Qasym-Jomart Toqaevtyń jańa Qazaqstan qurý bastamasyna halyq bolyp qoldaý kórsetý paryzymyz.
Elimizdiń saıası ómirinde ózgerister kezeńi bastaldy jáne bul bizdiń qoǵamnyń demokratııalyq, quqyqtyq negizde nyǵaıa túsýine jol ashady. Osy oraıda Nur Otan partııasynyń kezekten tys HHI sezinde Qasym-Jomart Toqaev qoǵamdyq qundylyqtar júıesine, saıası jáne áleýmettik-ekonomıkalyq salalarǵa túbegeıli ózgeris engizý qajet ekenine taǵy da nazar aýdardy.
Jańa Qazaqstan jaǵdaıyndaǵy endigi partııa qandaı bolýy kerek degen máseleni Prezıdent oryndy kóterip, usynystar engizdi. Ata Zańymyz boıynsha Prezıdent – barlyq qazaqstandyqtyń bostandyqtary men teń quqyqtarynyń saqtalýyna kepil tulǵa. Olaı bolsa Memleket basshysy Qazaqstandaǵy búkil partııaǵa ortaq tulǵa bolýy kerek.
Buǵan deıin Prezıdent jáne oblys ákimderi Nur Otan partııasynyń jetekshileri bolǵan soń, osy partııaǵa jappaı múshe bolý etek aldy. «Biz san jaǵynan músheleri eń kóp partııamyz» degen daqpyrtqa jol berilip, tipti tizimdep, eriksiz ótkizýge deıin bardyq. Kóńil-yqylasy men senimi joq, partııaǵa eriksiz múshe bolǵandardyń aldy kesheli-búgindi aryzdaryn berip, Nur Otan partııasynyń músheliginen shyǵyp jatqany osy aıtyp otyrǵan jaıdyń aqıqatyna kóz jetkizgendeı.
«Nur Otan ózin-ózi jańartýy kerek. Partııanyń búkil jumysyn sóz júzinde ǵana emes, túbegeıli qaıta qurý qajet», degen Q.Toqaev endigi arada biraz basymdyqqa basa mán berýge shaqyrdy. Eń áýeli partııa ishindegi yntymaqty nyǵaıtýdy, qoǵamdaǵy barlyq konstrýktıvti kúshti biriktirýdi birinshi mindet retinde atady. Prezıdenttiń «Jańa Qazaqstandy qurý úshin aýyzbirshiliktiń, seriktestiktiń, nyq ustanym men bolashaqqa senimniń mańyzy zor» degen pikirin tolyq qoldap, sóıler sózimizde de halqymyzdyń erteńgi jaqsy kúnine degen senimin bekitetin sóz aıta bilsek etti.
Ras, biz Qazaqstannyń jańa dáýirin qurýdy bastadyq. «Otyz jyl boıy qaıda boldyńdar, buryn nege aıtpadyńdar?» degen bos sózdi qoıa turalyq ta, elimizdi qalaı jańartamyz, ádiletti qoǵamdy qalaı quramyz, qaıtsek baı da baqýatty ómir súremiz, sol jaıynda oılanyp, iske kiriskenimiz abzal.
О́tken otyz jylǵa da jáne kimniń kim ekenine de ýaqyt, sol ýaqyttyń ıeligindegi tarıh jaýap beredi. Al ázirgimiz bos sóz bolyp qala beredi. Osy oraıda Prezıdentimiz Qasym-Jomart Toqaevtyń Elbasynyń 30 jylda el múddesi úshin atqarǵan jumysyn joqqa shyǵarmaý kerek ekenin, bul tarıhqa qııanat jasaý ekenin óte oryndy aıtty. Bul – eldik sóz.
Qazaqstannyń jańa dáýirin qalyptastyryp, elimizdi qazirgi tyǵyryqtan alyp shyǵa alatyn jáne ádildik pen adaldyq ornata alatyn kezeńniń bastalǵanyna seneıik. Qazirgi ýaqytta bári arzandasyn degen talap qoıýmen birge, bári arzan bolýy úshin shahtaǵa túsip kenińdi, kómirińdi óziń óndir, temirińdi óziń balqyt, malyńdy óziń baq, astyǵyńdy óziń ósir degen qaǵıdatty alǵa tartqanymyz da jón. Birlikte, yntymaqta bolaıyq, táýelsizdikti nyǵaıtaıyq!
Jabal ERǴALIEV,
Qazaqstannyń eńbek sińirgen qaıratkeri
KО́KShETAÝ