Bıylǵy qańtarda elimizde Koreıa eliniń dıplomatııalyq ókildiginiń qurylǵanyna 30 jyl toldy. Osyǵan oraı Koreıa Respýblıkasynyń Qazaqstandaǵy Tótenshe jáne ókiletti elshisi E.P.Ký Hong-sok BAQ, dıplomatııalyq mıssııa ókilderimen kezdesip, eki el arasyndaǵy baılanys deńgeıi týraly aıtyp berdi.
Eki el arasyndaǵy resmı baılanys 1992 jyly 28 qańtarda ornady. «Koreıa Qazaqstan Táýelsizdik alǵannan keıin kelesi jyly, ıaǵnı 1992 jyldyń qańtarynda dıplomatııalyq qatynastar ornatqan alǵashqy elderdiń biri boldy. Sodan beri Koreıa men Qazaqstan árqashan jaqyn dos jáne senimdi seriktes bolyp keledi. Sondaı-aq eki eldiń kóshbasshylary arasynda qatynas jalǵasyp, túrli jetistikterge qol jetkizdi», dedi elshi.
Dıplomatııalyq mıssııa ókiliniń aıtýynsha, Qazaqstan Koreıa úkimetiniń iske asyryp jatqan ekonomıkalyq yntymaqtastyq bastamasy – «Jańa soltústik saıasatynyń» negizgi seriktesi.
Búginde Ortalyq Azııa elderi arasynda Qazaqstan – Koreıamen saýda jasaý jáne ınvestısııa quıý kólemi boıynsha jetekshi el, al Qazaqstan úshin Koreıa kólemi jaǵynan tórtinshi saýda seriktesi. Pandemııanyń saldarynan týyndaǵan qıyndyqtarǵa qaramastan, eki el arasyndaǵy saýda kólemi joǵary deńgeıde saqtalyp tur.
«Qazaqstan joldarynda Koreıada jasalǵan kóptegen avtokólikterdi kórýge bolady, Koreıada óndirilgen smartfondar men turmystyq tehnıka árbir úıden, árbir oqý ornynan tabylady. Sońǵy ýaqytta koreıalyq kompanııalar sıfrly ındýstrııa, densaýlyq saqtaý jáne bolashaqtaǵy aýyl sharýashylyǵy sııaqty jańa salalardaǵy yntymaqtastyqty ártaraptandyrýǵa tyrysyp keledi. Atap aıtqanda, eki el arasyndaǵy kómirtegi beıtaraptylyǵy men jańartylatyn energetıka salasynda strategııalyq yntymaqtastyq ornatý úshin úlken áleýetimiz bar dep esepteımin.
Táýelsizdik alǵan sátte kólemi boıynsha álemdegi tórtinshi ıadrolyq derjava mártebesinen bas tartý jóninde batyl sheshim qabyldaǵan Qazaqstan – ıadrolyq qarýsyzdaný men denýklearızasııany belsendi qoldaıtyn halyqaralyq qoǵamdastyqtyń jaýapty múshesi. Meniń oıymsha, Qazaqstannyń beıbitshilik pen álemniń birlesip órkendeýi úshin ıadrolyq arsenaldan bas tartý týraly sheshimi Ortalyq Azııanyń turaqtylyǵy men órkendeýinde mańyzdy ról atqarady, sondaı-aq Qazaqstannyń halyqaralyq qoǵamdastyqtaǵy mártebesin nyǵaıta tústi. Iаdrolyq qarýsyzdaný týraly sheshim qabyldaǵan Qazaqstannyń úlgisi Koreıa túbeginde beıbitshilik ornatýǵa jaqsy úlgi bolady dep sanaımyn. Sondaı-aq men Koreıa Respýblıkasy Úkimetiniń Koreı túbegindegi beıbitshilik prosesin ilgeriletý jónindegi kúsh-jigerine myzǵymas qoldaý kórsetkeni úshin Qazaqstan Úkimetine rızashylyǵymdy bildirgim keledi», dedi elshi quttyqtaý sózinde.
E.P.Ký Hong-sok Qazaqstandaǵy elshi qyzmetine 2020 jylǵy maýsymda kirisken. «Qazaqstandyqtardyń Koreıaǵa degen úlken qyzyǵýshylyǵyna qýanyp, tań qalǵanym áli kúnge deıin esimde. Sonymen qatar qazaq mádenıetiniń koreı mádenıetimen uqsastyǵy tańyrqatty. Mysaly, qonaqjaılylyq, úlkenderge qurmet kórsetý, bir-birine syılastyqpen qaraý sııaqty dástúrler maǵan erekshe ystyq. Ásirese, 2014 jyly eki el arasyndaǵy vızany alyp tastaý týraly kelisim kúshine engennen beri azamattar arasyndaǵy mádenı jáne emosıonaldy uqsastyqtarǵa negizdelgen ózara almasý turaqty túrde keńeıe bastady. Sońǵy ýaqytta pandemııaǵa baılanysty saıahattar ýaqytsha qysqarǵanyna qaramastan, jaqyn arada azamattar arasyndaǵy baılanys qaıta jandanady dep senemin.
Koreıa men Qazaqstan arasyndaǵy qarym-qatynastardyń, ásirese ortaq baılanystyrýshy býyn – koreı dıasporasynyń arqasynda odan ári damýyna áleýeti jetedi dep sanaımyn. Qazirgi ýaqytta Qazaqstanda turatyn 108 myńǵa jýyq etnostyq koreıler Reseıdiń Qıyr Shyǵysynan kúshtep deportasııaǵa ushyraǵan koreılerdiń urpaqtary. Etnostyq azshylyqtardyń qandaı da bir kemsitýsiz damýyna jáne tabysqa jetýine erekshe kóńil bólinip, qoldaý kórsetiletin Qazaqstan Úkimeti júrgizip otyrǵan ultaralyq kelisim saıasatynyń nátıjesinde koreı dıasporasynyń ókilderi búginde mańyzdy ról atqarady jáne qazaqstandyq qoǵam ómirine belsendi qatysady», dep túıindedi sózin koreıalyq dıplomat.